Manoj Jarange Patil: मराठा आरक्षण, सातारा गॅझेटच्या जीआरची अंमलबजावणी, आंदोलकांवरील गुन्हे आणि कुणबी प्रमाणपत्रांच्या वैधतेच्या मुद्यावरून मराठा आंदोलक नेते मनोज जरांगें पाटील यांनी राज्य सरकारवर तीव्र टीका केली आहे. दिलेल्या आश्वासनांची पूर्तता न झाल्याने त्यांनी पुन्हा आंदोलनाचा इशारा दिला आहे.

जरांगे यांच्या म्हणण्यानुसार, मुंबईतील आंदोलनावेळी सातारा गॅझेटचा जीआर एक महिन्यात काढण्याचे आश्वासन देण्यात आले होते, मात्र आठ महिने उलटूनही कोणतीही ठोस कारवाई झालेली नाही. यामुळे मराठा समाजात नाराजी वाढत असल्याचे त्यांनी म्हटले आहे.

हेही वाचा: बॉम्ब बनवण्यासाठी यूट्यूबवरून घेतले प्रशिक्षण; हॉस्पिटलला लुटण्याचा होता प्लॅन, पुणे हडपसर बॉम्ब प्रकरणाचा मोठा खुलासा!

सरकारवर गंभीर आरोप

जालन्यात बोलताना जरांगे यांनी मुख्यमंत्री देवेंद्र फडणवीस (Devendra Fadnavis) यांच्यावर टीका करत मराठा समाजाच्या प्रश्नांकडे दुर्लक्ष होत असल्याचा आरोप केला. मराठा आंदोलकांवरील गुन्हे मागे घेण्यात आले नसल्याचेही त्यांनी नमूद केले.

कुणबी प्रमाणपत्र

कुणबी नोंदी सापडूनही अनेकांना जात वैधता प्रमाणपत्र मिळत नसल्याने समाजात अडचणी निर्माण झाल्याचा आरोपही त्यांनी केला. संबंधित प्रक्रियेत अपेक्षित वेग नसल्याने नाराजी वाढत असल्याचे त्यांनी सांगितले.

आंदोलनाचा इशारा

मराठा आरक्षणाच्या मागण्या पूर्ण होईपर्यंत मागे हटणार नाही, असे स्पष्ट करत जरांगे यांनी पुढील आंदोलनाची तारीख लवकरच जाहीर केली जाईल असे सांगितले. सरकारने तातडीने निर्णय घ्यावा, अन्यथा आंदोलन अधिक तीव्र होईल, असा इशाराही त्यांनी दिला आहे.