Bollywood Actress Campaigning for Thackeray Shiv Sena : महानगरपालिका निवडणुकीच्या प्रचार सध्या अंतिम टप्प्यात आहे. सर्वच राजकीय पक्ष आणि अपक्ष उमेदवारांसाठी शेवटचे काही दिवस महत्त्वाचे ठरणार आहेत. शहरातील जवळपास सर्वच प्रभागांमध्ये सभा, पदयात्रा, कोपरा बैठक, घरोघरी भेटी, वाहन रॅली आणि रोड शो यांचा धुरळा उडाल्याचं चित्र पाहायला मिळाले. राजकीय पक्षांनी जोरदार शक्तिप्रदर्शन केलं. तर बॉलिवूडच्या मोठ्या सेलिब्रिटींनीही राजकीय प्रचारासाठी हजेरी लावल्याचं पाहायला मिळालं. अभिनेत्री रवीना टंडननं नुकताच शिवसेना (उद्धव बाळासाहेब ठाकरे) पक्षाच्या उमेदवारांसाठी प्रचार केल्यानं राजकीय वर्तुळात चर्चेला उधाण आल्याचं दिसून आलं.
हेही वाचा – जिल्हा परिषदांचा धुरळा उडणार! १५ फेब्रुवारीपर्यंत निवडणुका पूर्ण करा, सुप्रीम कोर्टाचे आदेश
अभिनेत्री रवीना टंडन ही उद्धव बाळासाहेब ठाकरे शिवसेना पक्षाचा प्रचार करताना दिसून आली. रवीना टंडनचा व्हिडिओ सोशल मीडियावर चांगलाच व्हायरल होत आहे. यावेळी उमेदवाराच्या कामाचा आणि स्थानिक प्रश्नांचा उल्लेख करत मतदारांना मतदान करण्याचं आवाहन तिनं केलं. कला, संस्कृती आणि समाजाशी निगडित मुद्द्द्यांवर तिनं आपली भूमिका मांडल्याचं पाहायला मिळालं. सेलिब्रिटी प्रचारामुळं निवडणुकीच्या वातावरणात उत्साह वाढल्याचं दिसून आलं.
View this post on Instagram
रोड शोमध्ये रवीना टंडननं घेतला सहभाग
मुंबईतील एका महत्त्वाच्या मतदारसंघात आयोजित करण्यात आलेल्या रोड शोमध्ये रवीना टंडननं सहभाग घेतला. यावेळी त्यांना पाहण्यासाठी चाहत्यांनी आणि शिवसैनिकांनी मोठी गर्दी केली होती. “मशाल” चिन्हाचा प्रचार करत तिनं मतदारांना उद्धव ठाकरे यांच्या पाठीशी उभं राहण्याचं आवाहन केलं.
महाराष्ट्राची संस्कृती आणि अस्मिता टिकवण्यासाठी शिवसेनेला साथ
प्रचारादरम्यान प्रसारमाध्यमांशी बोलताना रवीना टंडन हिनं म्हटलं की, “महाराष्ट्राची संस्कृती आणि अस्मिता टिकवण्यासाठी जे प्रामाणिक प्रयत्न सुरू आहेत, त्याला साथ देणं हे माझं कर्तव्य वाटतं. संकटकाळात ज्या पद्धतीनं काम झालं, ते कौतुकास्पद आहे.” रवीना टंडन ही केवळ एक अभिनेत्री नसून ती सामाजिक विषयांवरही आपलं मत ठामपणं मांडत असते. त्यामुळे तिनं ‘उबाठा‘ गटाला दिलेला पाठिंबा हा तरुण आणि महिला मतदारांना आकर्षित करण्यासाठी महत्त्वाचा ठरू शकतो, अशी चर्चा राजकीय विश्लेषकांमध्ये रंगली आहे.
