NCP Merger : महाराष्ट्राच्या राजकारणात राष्ट्रवादी काँग्रेसच्या दोन्ही गटांच्या विलीनीकरणाची चर्चा पुन्हा एकदा रंगू लागली आहे. शरद पवार यांच्या आजारपणाच्या काळात विविध राजकीय नेत्यांनी त्यांची भेट घेतली. या भेटी प्रकृतीची विचारपूस करण्यासाठी असल्याचे सांगितले जात असले, तरी त्यामागे राजकीय चर्चा सुरू असल्याच्या शक्यतेवरून तर्कवितर्कांना उधाण आले आहे.

प्रफुल्ल पटेल, पार्थ पवार यांच्यासह महाविकास आघाडीतील नेत्यांच्या भेटींमुळे या चर्चेला अधिक हवा मिळाली. दरम्यान, मुख्यमंत्री देवेंद्र फडणवीस यांनी विलीनीकरणाच्या मुद्द्यावर भाष्य करत महायुती आणि एनडीएला विश्वासात घेण्याची अपेक्षा व्यक्त केली आहे. (NCP Merger)

शरद पवारांच्या भेटीगाठींमुळे विलीनीकरणाची चर्चा पुन्हा सुरू

शरद पवार रुग्णालयात उपचार घेत असताना राष्ट्रवादी काँग्रेसचे ज्येष्ठ नेते प्रफुल्ल पटेल यांनी त्यांची भेट घेतली होती. या भेटीनंतर १० नोव्हेंबरनंतर पुन्हा भेटून चर्चा करण्याचा उल्लेख झाल्याने राजकीय वर्तुळात अनेक तर्कवितर्क सुरू झाले. त्यानंतर पार्थ पवार यांनीही शरद पवार यांची दोन दिवस भेट घेतली. (Sharad Pawar NCP)

याशिवाय राष्ट्रवादी काँग्रेस शरदचंद्र पवार पक्षातील जयंत पाटील, शशिकांत शिंदे, अमोल कोल्हे, अनिल देशमुख आणि जितेंद्र आव्हाड यांसारख्या नेत्यांनीही शरद पवार यांची भेट घेतली. या भेटी केवळ प्रकृतीची विचारपूस आणि आशीर्वाद घेण्यासाठी असल्याचे संबंधित नेत्यांनी स्पष्ट केले. मात्र, या घडामोडींच्या पार्श्वभूमीवर दोन्ही राष्ट्रवादी गट पुन्हा एकत्र येणार का, हा प्रश्न चर्चेत आला आहे.

अजित पवार यांच्या काळातील चर्चेचा पुन्हा उल्लेख

राष्ट्रवादीच्या विलीनीकरणाच्या चर्चेला पुन्हा वेग येण्यामागे प्रदेशाध्यक्ष सुनील तटकरे यांच्या विधानाचाही संदर्भ दिला जात आहे. अजित पवार हयात असते, तर दोन्ही गटांचे विलीनीकरण फेब्रुवारीमध्येच झाले असते, असे तटकरे यांनी म्हटले होते. त्यामुळे अजित पवार यांच्या काळात दोन्ही गटांमध्ये नेमक्या कोणत्या पातळीवर चर्चा सुरू होती, याबाबत उत्सुकता निर्माण झाली आहे. (NCP Merger News)

दुसरीकडे, सुनेत्रा पवार यांच्या नेतृत्वाखाली राष्ट्रवादी काँग्रेसची पुढील राजकीय वाटचाल सुरू आहे. पक्षातील काही वरिष्ठ नेत्यांमध्ये विलीनीकरणाच्या चर्चेबाबत स्पष्टता नसल्याचेही वृत्त समोर आले आहे. मात्र, सुनेत्रा पवार किंवा पक्षाच्या अधिकृत नेतृत्वाने विलीनीकरणाचा निर्णय जाहीर केलेला नाही.  (Sunetra Pawar NCP)

फडणवीस म्हणाले, महायुती आणि एनडीएला विश्वासात घ्यावे लागेल

राष्ट्रवादीच्या दोन्ही गटांच्या संभाव्य विलीनीकरणाबाबत मुख्यमंत्री देवेंद्र फडणवीस यांनी स्पष्ट भूमिका मांडली आहे. दोन्ही पक्ष स्वतंत्र राजकीय पक्ष असून त्यांना स्वतःचे निर्णय घेण्याचा अधिकार आहे. त्यामुळे त्यांच्या वतीने आपण कोणतीही भूमिका मांडणे योग्य ठरणार नाही, असे त्यांनी सांगितले. (Devendra Fadnavis on NCP Merger)

मात्र, राष्ट्रवादी काँग्रेस हा महायुतीचा आणि एनडीएचा घटक पक्ष आहे. भाजप हा दोन्ही आघाड्यांमधील प्रमुख घटक असल्याने विलीनीकरणाबाबत चर्चा सुरू असेल किंवा असा निर्णय घेतला जाणार असेल, तर भाजपला विश्वासात घेतले जाईल, अशी अपेक्षा फडणवीस यांनी व्यक्त केली. आतापर्यंत दोन्ही गटांनी विलीनीकरणाच्या चर्चेबाबत भाजपला कोणतीही अधिकृत माहिती दिलेली नसल्याचेही त्यांनी स्पष्ट केले.

राष्ट्रवादीचे दोन्ही गट एकत्र येणार की स्वतंत्र राहणार?

एका बाजूला शरद पवार यांच्या भेटीगाठी, दुसरीकडे अजित पवार यांच्या काळातील विलीनीकरणाच्या चर्चेचा उल्लेख आणि आता फडणवीस यांचे भाष्य, यामुळे महाराष्ट्राच्या राजकारणात या विषयाची चर्चा पुन्हा सुरू झाली आहे. मात्र, दोन्ही राष्ट्रवादी गटांकडून विलीनीकरणाबाबत अधिकृत घोषणा झालेली नाही. (Mahayuti Alliance)

त्यामुळे राष्ट्रवादीचे दोन्ही गट एकत्र येण्याच्या दिशेने प्रत्यक्ष पावले उचलणार का, या प्रक्रियेत सुनेत्रा पवार आणि पक्षातील वरिष्ठ नेत्यांची भूमिका काय असेल आणि महायुतीतील भाजपची भूमिका कशी असेल, याकडे राजकीय वर्तुळाचे लक्ष लागले आहे.

हेही वाचा : शरद पवारांची प्रकृती चिंताजनक, नेत्यांची धावपळ.. रुग्णालयात काय घडतंय ?