School Theek Karo Campaign : जेव्हा देशातील तरुण जागा होतो, तेव्हा क्रांती घडल्याशिवाय राहत नाही. देशाच्या आणि समाजाच्या परिवर्तनात युवकांची भूमिका कायमच मोठी राहिली आहे. भारताच्या लोकशाहीत आंदोलनांना नेहमीच एक वेगळं आणि महत्त्वाचं स्थान राहिलंय. पण आज आंदोलनांची पद्धत, नेतृत्व आणि लोकांना जोडण्याची ताकद यामध्ये मोठा बदल झालेला दिसतोय.

सोशल मीडियावरच्या एका छोट्याशा पेजपासून ते दिल्लीच्या जंतरमंतरवर तब्बल ३६ दिवस ठिय्या देणाऱ्या मोठ्या जनआंदोलनापर्यंतचा कॉक्रोच जनता पार्टीचा प्रवास हा आधुनिक भारताच्या राजकारणातला लक्षवेधी टप्पा म्हणावा लागेल. अभिजीत दिपके आणि त्यांच्या तरुण सहकाऱ्यांनी फक्त व्यवस्थेला प्रश्न विचारले नाहीत, तर देशातील तरुणांना आपल्या हक्कांसाठी आवाज उठवण्याची हिंमत दिलीये.

CJP चं ‘स्कूल ठीक करो’ अभियान नेमकं काय? ( CJP campaign )

जंतरमंतरवर NEET परीक्षेतील गैरप्रकार आणि शिक्षण व्यवस्थेतील गोंधळाविरोधात झालेल्या आंदोलनानंतर आता या लढ्याचा पुढचा टप्पा आणखी जोरात सुरू झालाय. सीजेपीने नुकतंच ‘स्कूल ठीक करो’ हे अभियान सुरू केलंय. या अभियानातून सोशल मीडिया आणि प्रत्यक्ष मैदानातली लढाई यांची ताकद एकत्र आणण्याचा प्रयत्न होतोय.
जंतरमंतरच्या आंदोलनानंतर आणि तत्कालीन केंद्रीय शिक्षणमंत्र्यांच्या राजीनाम्यानंतर सीजेपीने राजकारणात जाण्याऐवजी विद्यार्थी आणि युवा चळवळ मजबूत करण्याचा निर्णय घेतला. याचाच भाग म्हणून स्वातंत्र्यदिनाचं औचित्य साधून महाराष्ट्रातील हिंगोली जिल्ह्यातील संतुक पिंपरी या ग्रामीण भागातून ‘स्कूल ठीक करो’ अभियानाला सुरुवात झाली.

अभिजीत दिपके आणि सीजेपीचे कार्यकर्ते गावागावातल्या सरकारी आणि जिल्हा परिषद शाळांमध्ये जाऊन प्रत्यक्ष परिस्थिती पाहत आहेत. शाळेत पिण्याचं स्वच्छ पाणी आहे का? स्वच्छतागृह आहेत का? मुलांना बसायला बेंच आहेत का? पुरेसे शिक्षक आहेत का? विद्यार्थ्यांना जेवण व्यवस्थित मिळतंय का? अशा साध्या पण अत्यंत महत्त्वाच्या प्रश्नांवर ते प्रशासनाला थेट जाब विचारत आहेत.

आणि या सगळ्यातली खरी ताकद कुठे दिसतेय, तर गावातल्या मुलांमध्ये आणि पालकांमध्ये. ज्या पालकांना आणि विद्यार्थ्यांना वर्षानुवर्षे आपल्या हक्कांबद्दल बोलायलाही भीती वाटत होती, तेच आता मोबाईल हातात घेऊन आपल्या शाळेची अवस्था दाखवतायत. सोशल मीडियावर व्हिडीओ टाकतायत, प्रश्न विचारतायत आणि प्रशासनाकडून उत्तर मागतायत. आंदोलनाचं हेच खरं यश आहे.

हेही वाचा : बळीराजाची प्रतीक्षा संपणार? कर्जमाफीच्या निधीबाबत कृषिमंत्री भरणेंनी दिली मोठी

सरकारी शाळांमधील समस्या जाणून घेण्यासाठी CJP मैदानात ( School Theek Karo Campaign )

अनेकदा सत्ताधारी पक्षाचे लोक किंवा काही विरोधक एक प्रश्न विचारतात, आंदोलन झालं, धर्मेंद्र प्रधान यांनी राजीनामा दिला, पण जंतरमंतरच्या आंदोलनातून मिळालं तरी काय?

याचं उत्तर ग्राउंडवर दिसतंय. जंतरमंतरच्या आंदोलनाने देशातील तरुण मुला-मुलींना एक गोष्ट शिकवली—सत्ता मोठी असली तरी प्रश्न विचारण्याचा अधिकार त्याहून मोठा आहे. कोणत्याही राजकीय दबावाला न घाबरता आपल्या हक्कांसाठी उभं राहता येतं, हे या आंदोलनाने तरुणांना दाखवून दिलं. देशाला स्वातंत्र्य मिळून ८० वर्षे पूर्ण होत आली आहेत. तरीही एखाद्या शेतकऱ्याच्या किंवा मजुराच्या मुलाला शाळेत स्वच्छ पाणी, टॉयलेट, शिक्षक आणि नीट बसण्याची जागा मिळण्यासाठी संघर्ष करावा लागत असेल, तर हा फक्त त्या शाळेचा प्रश्न नाही. हा संपूर्ण व्यवस्थेचा पराभव आहे. हीच जाणीव सीजेपी तरुणांच्या मनात निर्माण करण्याचा प्रयत्न
करतंय.

आज अनेक विद्यार्थी फक्त तक्रार करताना दिसत नाहीत. ते ‘इन्कलाब जिंदाबाद’ आणि ‘जय भीम’चे नारे देताना दिसतायत. हे नारे फक्त हवेत विरणारे शब्द नाहीत. त्यामागे अन्यायाविरोधात उभं राहण्याची, विषमता मोडून काढण्याची आणि प्रत्येकाला समान दर्जाचं शिक्षण मिळावं अशी मागणी आहे.
सोशल मीडिया आज फक्त रील्स, मनोरंजन आणि टाइमपासपुरता राहिलेला नाही. योग्य पद्धतीने वापरला तर तो लोकशाहीतलं एक जबरदस्त हत्यार ठरू शकतो, हे सीजेपीच्या आंदोलनाने दाखवून दिलंय. आणि जेव्हा या आवाजाला दाबण्याचा प्रयत्न होतो, तेव्हा उलट हा आवाज आणखी मोठा होतो.

‘स्कूल ठीक करो’ अभियानाचा देशभर विस्तार ( School Theek Karo Campaign )

सीजेपीचं इंस्टाग्राम अकाउंट अचानक गायब होणं असो किंवा दिल्लीत बैठकीसाठी घेतलेला हॉल ऐनवेळी रद्द होणं असो, अशा घटनांनंतर सोशल मीडियावरचे लोक आणखी आक्रमकपणे या चळवळीच्या बाजूने उभे राहिले. हॉल मिळाला नाही तर बैठक रस्त्यावर घेऊ, पण आवाज बंद करणार नाही, ही भूमिका तरुणांना भावतेय.
याचा परिणाम फक्त दिल्लीपुरता राहिलेला नाही. देशाच्या वेगवेगळ्या भागात, छोट्या शहरांमध्ये आणि गावांमध्ये विद्यार्थी आपल्या स्थानिक प्रश्नांसाठी आवाज उठवताना दिसतायत. कुठे रस्त्याच्या मागणीसाठी शाळकरी मुलं रस्त्यावर उतरतायत, तर कुठे कॉलेजच्या फीवाढीविरोधात विद्यार्थी एकत्र येतायत.

यामागे एकच गोष्ट आहे, आता तरुण प्रश्न विचारायला घाबरत नाही. सीजेपीचं हे आंदोलन एका अर्थाने भारतीय लोकशाहीतल्या दबावगटाची भूमिका बजावतंय. फक्त सत्ताधारी आणि विरोधी पक्ष असणं पुरेसं नसतं. सत्तेत कोण असेल यापेक्षा जनतेचे प्रश्न कोण मांडणार, हा प्रश्नही महत्त्वाचा आहे.

School Theek Karo Campaign : सीजेपीने निवडणुकीच्या राजकारणापासून दूर राहून शिक्षण, रोजगार आणि विद्यार्थ्यांच्या प्रश्नांवर लक्ष केंद्रित करण्याचा निर्णय घेतलाय. ‘स्कूल ठीक करो’च्या माध्यमातून पालकांना आपल्या गावातल्या शाळांचं सोशल ऑडिट करण्याचं आवाहन केलं जातंय. सरपंच, स्थानिक नेते आणि प्रशासनाला त्यांच्या जबाबदारीची आठवण करून दिली जातेय.
ही प्रक्रिया खरं तर लोकशाहीला गावापर्यंत घेऊन जाणारी आहे. लोकशाही फक्त मुंबईच्या मंत्रालयात किंवा दिल्लीच्या संसदेत नसते. ती गावातल्या जिल्हा परिषद शाळेतही असते. त्या शाळेत शिकणाऱ्या मुलाला चांगलं शिक्षण मिळणं, त्याला स्वच्छ पाणी मिळणं आणि सुरक्षित वातावरण मिळणं हा त्याचा अधिकार आहे, उपकार नाही.
आणि जेव्हा गावातला सामान्य माणूस प्रशासनाला थेट प्रश्न विचारायला लागतो, तेव्हाच खरी लोकशाही मजबूत होते. म्हणूनच सीजेपीचा हा लढा केवळ एखाद्या शाळेची दुरुस्ती करण्यापुरता मर्यादित नाही. हा तरुणांच्या विचारात बदल घडवण्याचा प्रयत्न आहे. जोपर्यंत देशातील तरुण आणि विद्यार्थी आपल्या हक्कांसाठी स्वतः आवाज उठवत नाहीत, तोपर्यंत मोठा आणि शाश्वत बदल घडणं कठीण आहे. आज सीजेपी आणि अभिजीत दिपके यांच्या नेतृत्वातून तरुणांनी हातात घेतलेला हा बदलाचा झेंडा हळूहळू आणखी मोठा होताना दिसतोय.

CJP चं आंदोलन शिक्षण व्यवस्थेत बदल घडवणार का? ( student protest India )

सोशल मीडियावरचा आवाज आणि जमिनीवरची लढाई यांची सांगड घालून उभं राहिलेलं हे आंदोलन पुढच्या काळात किती मोठं रूप घेतं, हे पाहणं महत्त्वाचं ठरणार आहे. अन्याय सहन करायचा नाही, प्रश्न विचारायचे, हक्क मागायचे आणि गरज पडली तर त्यासाठी रस्त्यावर उतरायचं—ही मानसिकता जर देशातील तरुणांमध्ये रुजली, तर बदल होणारच.

आता प्रश्न एवढाच आहे, ही चळवळ किती दूर जाते? तुम्हाला काय वाटतं? सीजेपीचं ‘स्कूल ठीक करो’ अभियान खरंच देशातील शिक्षण व्यवस्थेत बदल घडवू शकतं का? तुमचं मत कमेंटमध्ये नक्की सांगा.