NEET Paper Leak Case | नीट पेपरफुटी प्रकरणाने (NEET Paper Leak Case) सर्वांनाच हादरवून सोडले आहे. कारण या प्रकरणात दररोज नवनवीन खुलासे होताना दिसत आहेत. आत्तापर्यंत या प्रकरणात अनेक बड्या व्यक्तींना अटक करण्यात आली आहे. यामध्ये महाराष्ट्रात सर्वात मोठी आणि प्रसिद्ध असलेली नीट-जेईई कोचिंगच्या संस्थेचे मालक शिवराज मोटेगावकर (Shivraj Motegaonkar) यांना पोलिसांनी बेड्या ठोकल्या आहेत. त्यानंतर आता या प्रकरणी सीबीआयने (CBI) एका डॉक्टरला ताब्यात घेतले आहे.

हेही वाचा – ठाण्यात आगीचे रौद्ररूप! पहाटेच्या वेळी भाजी मार्केटला लागली भीषण आग, 2 जणांचा होरपळून मृत्यू

CBI तपासात नेमका काय झाला खुलासा?

नीट पेपरफुटी प्रकरणाचा तपास सध्या सीबीआयकडून केला जात आहे. तर सीबीआयच्या तपासात आता मोठी माहिती समोर आली आहे. सीबीआयने लातूरच्या बालरोगतज्ज्ञ डॉक्टर मनोज शिरूरे याला अटक केली आहे. मनोज शिरूरेचे मोटेगावकरांसोबत कनेक्शन सापडले असून धक्कादायक माहिती सीबीआयच्या हाती लागल्याने त्याला अटक करण्यात आली आहे.

मिळालेल्या माहितीनुसार, डॉ. मनोज शिरूरे याने स्वत:च्या मुलासाठी मोटेगावकरांकडून पेपर खरेदी केल्याचा धक्कादायक खुलासा झाला आहे. या प्रकरणी पोलिसांनी त्याला ताब्यात घेत चौकशीसाठी लातूरहून पुण्याला आणलं होतं. त्यानंतर त्याची कसून चौकशी सीबीआयने केली आणि त्याला बेड्या ठोकण्यात आल्या.

तपासादरम्यान संशयास्पद माहिती मिळाल्यानंतर सीबीआयने पुण्यात काही संशयित विद्यार्थ्यांच्या घरांवर छापा टाकला होता. यादरम्यान काल रात्री लातूरमध्येही सीबीआयने ही कारवाई केली. त्यावेळी मनोज शिरूरेच्या घरीही सीबीआयने धाड टाकत त्याला अटक केली. शिरूरे हा मोटेगावकर आणि पी. व्ही. कुलकर्णी यांच्या संपर्कात असल्याची माहिती सीबीआयला मिळाली आहे.

दरम्यान, सध्या सीबीआय या प्रकरणाचा अधित तपास करत आहेत. शिरूरेने नेमका पेपर कोणाकडून विकत घेतला आणि त्याने तो पेपर आणखी कोणाला दिला होता का? याचा तपास केला जात आहे.