Shweta Tiwari Troll : मराठी माणूस असण्याचा काही अर्थ उरलाय का ? स्वताला अभिमानाने मराठी माणूस म्हणणारे महिलांना अपशब्द वापरतात, तेव्हा राज ठाकरेजी असे लोक जर तुमचे समर्थक असतील तर त्यांचं वर्तन तुम्हाला मान्य आहे का ? असा सवाल राज ठाकरे यांना विचारलाय प्रसिद्ध टेलिव्हिजन अभिनेत्री श्वेता तिवारी यांनी…. श्वेता तिवारी यांच्यासोबत घडलेला हा प्रकार सध्या संपूर्ण महाराष्ट्रात आणि सोशल मीडियावर प्रचंड चर्चेचा विषय ठरला आहे. हा संपूर्ण वाद एका ऑनलाईन फूड डिलिव्हरी ॲपच्या निष्काळजीपणापासून सुरू झाला, पण पुढे त्याला मराठी अस्मिता, सुशिक्षित लोकांची विकृत मानसिकता आणि राजकीय नेत्यांच्या समर्थकांचा संदर्भ मिळाल्याने या वादाने गंभीर वळण घेतलं. काय आहे हा वाद पाहूयात….
श्वेता तिवारीने मुंढेंना का केलं TAG? ( Shweta Tiwari Troll )
या संपूर्ण वादाची ठिणगी पडली ती श्वेता तिवारीने तिच्या घरातून केलेल्या एका साध्या ऑनलाईन ऑर्डरमुळे. श्वेताने स्विगी इन्स्टामार्ट या ऑनलाईन डिलिव्हरी सेवेचा वापर करून तिच्या घरी रेड बुल या एनर्जी ड्रिंकचे काही कॅन्स मागवले होते. जेव्हा ही ऑर्डर तिच्या घरी पोहोचली, तेव्हा त्या पॅकेजिंगसोबत किंवा साहित्यासोबत तिच्या घरात एक जिवंत झुरळ देखील आलं. श्वेताने या घटनेचा एक छोटा व्हिडिओ सोशल मीडियावर पोस्ट केला. हा व्हिडिओ पोस्ट करताना तिने तुकाराम मुंढे यांना टॅग केलं. ऑनलाईन अन्न पुरवठा करणाऱ्या कंपन्यांच्या अशा निष्काळजीपणावर कायदेशीर कारवाई करण्याची मागणी केली.
या व्हिडिओनंतर श्वेता तिवारी तिच्या एका आगामी रिअॅलिटी शोच्या प्रमोशनसाठी तिची सह-कलाकार पारुल गुलाटी हिच्यासोबत इन्स्टाग्रामवर लाईव्ह आली होती. या लाईव्ह सेशनमध्ये त्यांनी सुरुवातीला त्यांच्या कामाबद्दल आणि शोबद्दल गप्पा मारल्या. गप्पा मारत असताना श्वेताने काही वेळापूर्वी तिच्यासोबत घडलेल्या त्या झुरळाच्या प्रकरणाचा आणि ऑनलाईन डिलिव्हरीच्या घसरलेल्या दर्जाचा पुन्हा एकदा उल्लेख केला.परंतु, सोशल मीडियावरील काही युजर्सना श्वेताने केलेली ही तक्रार रुचली नाही. तिने महाराष्ट्रातील एका आयएएस अधिकाऱ्याला टॅग करून व्यवस्थेवर बोट ठेवलं, असा विपर्यास केलेला अर्थ काही ट्रोल्सनी काढला. एका उत्तर भारतीय अभिनेत्रीने मुंबईत राहून अशा प्रकारे महाराष्ट्रातील व्यवस्थेची तक्रार करणे म्हणजे महाराष्ट्राचा आणि मराठी माणसाचा अपमान आहे, असा प्रांतीय वाद निर्माण करणारा अँगल या प्रकरणाला दिला गेला. बघता बघता श्वेता तिवारीच्या कमेंट बॉक्समध्ये हुल्लडबाजांनी शिरकाव केला आणि तिला टार्गेट करण्यास सुरुवात केली.
हेही वाचा : सोयाबीननं माना टाकल्या पाऊसाची दडी शेतकरी मोठ्या संकटात!
श्वेता तिवारीला सोशल मीडियावर ट्रोलिंग ( Shweta Tiwari Troll )
काही युजर्सनी श्वेता तिवारीला अत्यंत घाणेरडी, अश्लील आणि हिडीस भाषा वापरून शिवीगाळ करण्यास सुरुवात केली. ट्रोल्सनी श्वेताच्या वैयक्तिक आयुष्यावर चिखलफेक करताना तिच्या दोन निष्पाप मुलांनाही यात ओढले. तिची मोठी मुलगी पलक तिवारी आणि तिचा अवघा ८ वर्षांचा लहान मुलगा यांच्यावर अत्यंत आक्षेपार्ह आणि घाणेरड्या कमेंट्स करण्यात आल्या. जेव्हा हा अश्लील शिवीगाळीचा पूर ओसरत नव्हता, तेव्हा श्वेताने तिला मेसेज बॉक्समध्ये आणि कमेंट्समध्ये अतिशय घाणेरड्या शिव्या देणाऱ्या लोकांचे इन्स्टाग्राम प्रोफाईल उघडून पाहिलं तेव्हा समोर आलं कि, हे लोक कोणी अशिक्षित, रस्त्यावरील गुंड किंवा अडाणी गुन्हेगार नव्हते, तर ते समाजातील तथाकथित सुशिक्षित वर्गातील लोक होते.
Shweta Tiwari : श्वेताने संतापून एका विशिष्ट युजरच्या प्रोफाईलचा स्क्रीनशॉट सोशल मीडियावर सार्वजनिक केला. हा व्यक्ती व्यवसायाने एक डॉक्टर होता.
याहूनही मोठी आणि खळबळजनक बाब श्वेताच्या दाव्यातून समोर आली. तिने दाखवून दिले की, तिच्या प्रोफाईलवर अश्लील कमेंट्स करणाऱ्या आणि तिला घाणेरड्या शिव्या देणाऱ्या अनेक पुरुषांच्या बायोमध्ये त्यांनी स्वतःला मराठी माणूस, मराठी संस्कृतीचे रक्षक आणि मनसे अध्यक्ष राज ठाकरे कट्टर समर्थक असे लिहून ठेवले होते. ट्रोल करणाऱ्या व्यक्तींच्या प्रोफाईलवर राज ठाकरे यांचे फोटो आणि त्यांच्या पक्षाचा उल्लेख दिसत होता. स्वतःला राज ठाकरेंचे समर्थक म्हणवणाऱ्या या तथाकथित मराठी माणसांच्या आणि कार्यकर्त्यांच्या या वागणुकीमुळे श्वेता तिवारीचा संताप अनावर झाला. तिने या प्रकरणाचे स्क्रीनशॉट्स काढून आपल्या इन्स्टाग्राम स्टोरीवर पोस्ट केले आणि मनसे अध्यक्ष राज ठाकरे यांना टॅग करत प्रश्न विचारले.
राज ठाकरेंना TAG करत श्वेताने काय सवाल केला? ( Shweta Tiwari Raj Thackeray )
श्वेताने राज ठाकरेंना ( Raj Thackeray ) थेट जाब विचारताना म्हटलंय की, जर असे विकृत आणि महिलांचा अपमान करणारे लोक तुमचे समर्थक असतील, तर मला खरोखर हे जाणून घ्यायला आवडेल की त्यांचे हे वर्तन तुम्हाला मान्य आहे का? स्वतःला तुमचे समर्थक म्हणवणारे हे लोक सोशल मीडियावर महिलांना अशा अश्लील शिव्या देतात, हे तुमच्या संमतीने चालते का? तिने मराठी अस्मितेचा गैरवापर करणाऱ्यांना खडेबोल सुनावताना लिहिले की, फक्त मराठी बोलणं, स्वत:ला मराठी म्हणवणं इतकंच पुरेसं नाही. मराठी माणूस असण्याचा अर्थ सोशल मीडियावर महिलांच्या मेसेज बॉक्समध्ये जाऊन त्यांना अश्लील भाषेत शिव्या देणे हाच उरला आहे का? तिने या वादात तिची महाराष्ट्राबद्दलची भूमिका देखील मांडली. तिने सांगितले की, जरी तिचे गाव उत्तर प्रदेशातीलअसले, तरी तिचा जन्म मुंबईत झाला आहे आणि तिचे संपूर्ण आयुष्य, बालपण, शिक्षण आणि करिअर महाराष्ट्रातच घडले आहे. त्यामुळे तिला महाराष्ट्राबद्दल आणि मराठी संस्कृतीबद्दल अत्यंत आदर आहे.
श्वेताने म्हटलंय कि, मराठी संस्कृती ही नेहमीच महिलांचा आदर करणारी संस्कृती म्हणून ओळखली जाते. छत्रपती शिवाजी महाराजांच्या महाराष्ट्रात परस्त्रीला मातेसमान मानले गेले आहे, महिलांना आदराचे स्थान दिले गेले आहे. मग स्वतःला मराठी आणि राज ठाकरेंचे समर्थक म्हणवणारे हे लोक सोशल मीडियावर कोणत्याही अनोळखी महिलेच्या केवळ विचारांशी असहमत असल्यामुळे तिचा असा हिडीस अपमान कसे काय करू शकतात? ही कोणती मराठी संस्कृती आहे? असा रोकठोक सवाल तिने उपस्थित केला.
मराठी माणूस आणि महिलांच्या सन्मानाचा मुद्दा ( Shweta Tiwari )
या संपूर्ण प्रकरणात राज ठाकरे यांचा वैयक्तिक कोणताही संबंध नाही. परंतु, आजच्या डिजिटल युगात एक नवीनच कल पाहायला मिळतो, जिथे अनेक हुल्लडबाज किंवा सामान्य नागरिक कोणत्याही मोठ्या राजकीय नेत्याचे नाव किंवा फोटो आपल्या प्रोफाईलवर लावतात आणि त्या नावाचा आडोसा घेऊन इंटरनेटवर दादागिरी, ट्रोलिंग किंवा शिवीगाळ करतात. राज ठाकरे हे महाराष्ट्रात त्यांच्या रोखठोक भूमिकेसाठी, मराठी अस्मितेच्या रक्षणासाठी आणि शिस्तीसाठी ओळखले जातात. अशा परिस्थितीत, त्यांच्याच नावाचा आणि पक्षाचा आडोसा घेऊन जर काही विकृत लोक सोशल मीडियावर महिलांवर आणि लहान मुलांवर अश्लील हल्ले करत असतील, तर हे त्यांच्या नेत्याच्या आणि पक्षाच्या प्रतिमेला काळीमा फासणारे आहे. याच मुख्य कारणामुळे श्वेताने थेट राज ठाकरेंना या वादात टॅग केले, जेणेकरून त्यांच्या नावाचा गैरवापर करणाऱ्या समर्थकांचे खरे रूप त्यांच्यापर्यंत पोहोचावे आणि त्यांनी यावर काहीतरी ठोस पाऊल उचलावे.
श्वेता तिवारीने उपस्थित केलेला हा मुद्दा केवळ तिच्या वैयक्तिक अपमानापुरता मर्यादित नाही, तर तो आजच्या डिजिटल युगातील महिलांच्या असुरक्षिततेवर बोट ठेवतो. आज सोशल मीडियावर कोणत्याही महिला सेलिब्रिटीने किंवा सामान्य मुलीने तिचे मत मांडले, तर तिला ट्रोलिंगच्या नावाखाली लैंगिक आणि अश्लील शिवीगाळ केली जाते. कार्यकर्त्यांनी आपल्या नेत्यांचे फोटो लावून सोशल मीडियावर हुल्लडबाजी करणे आणि चांगल्या पदावर असलेल्या लोकांनी फेसबुक किंवा इन्स्टाग्रामवर महिलांचा असा अपमान करणे, हे आपल्या समाजाच्या नैतिक अधःपतनाचे लक्षण आहे. श्वेता तिवारीने या ट्रोल्सना न घाबरता, त्यांचे स्क्रीनशॉट काढून त्यांना थेट उघडे पाडले आणि एका मोठ्या राजकीय नेत्याला टॅग करून विचारलेले प्रश्न सध्या महाराष्ट्राच्या राजकीय आणि सामाजिक वर्तुळात प्रचंड गाजत आहेत. या प्रकरणावर आता मनसे किंवा स्वतः राज ठाकरे काही भूमिका घेतात का आणि त्या अश्लील ट्रोल्सवर काही कायदेशीर कारवाई होते का, याकडे संपूर्ण महाराष्ट्राचे लक्ष लागले आहे.
