Operation Tiger Maharashtra politics : राज्याच्या राजकारणात सध्या अनेक मोठ्या घडामोडींना वेग आलाय, खरात प्रकरणानं राज्यातील राजकारण हलवून सोडलं असतानाच आता ऑपरेशन टायगर आणि विलीनीकरण या दोन चर्चा राज्याचं राजकारण पुन्हा बुचकाळ्यात टाकतायत. कारण एकीकडे राष्ट्रवादी आणि शिंदेंच्या शिवसेनेचे आमदार भाजपात विलीन होणार असल्याचे दावे सुरू असतानाच आता उपमुख्यमंत्री सुनेत्रा पवार दिल्लीत पोहोचल्या आहेत, त्या बड्या नेत्यांच्या भेटीगाठी घेण्याची शक्यता आहे, त्यातच आता काल रात्रीच्या काही फोटोंनी एकच चर्चा सुरू झालीय, ती म्हणजे ऑपरेशन टायगरची.

दिल्लीत सध्या सुरू असलेल्या राजकीय हालचालींमुळे महाराष्ट्राच्या राजकारणात पुन्हा एकदा मोठी उलथापालथ होण्याची शक्यता वर्तवण्यात येत आहे. केंद्रीय मंत्री आणि शिंदे गटाचे नेते प्रतापराव जाधव यांनी आयोजित केलेल्या एका खास स्नेहभोजनाला उद्धव ठाकरे गटाच्या दोन प्रमुख खासदारांनी हजेरी लावल्याने राजकीय वर्तुळात खळबळ उडाली आहे. या घटनेमुळे शिंदे गटाने आखलेल्या ‘ऑपरेशन टायगर’ या मोहिमेला वेग आल्याचे संकेत मिळत आहेत. आता हे डिनर डिप्लोमसी प्रकरण काय होतं? हे सविस्तर जाणून घेऊयात.

ठाकरेंचे खासदार शिंदेच्या डिनर डिप्लोमसीला

एप्रिल २०२६ च्या पहिल्या आठवड्यात दिल्लीत राजकीय हालचालींना वेग आला आहे. केंद्रीय मंत्री प्रतापराव जाधव यांनी आपल्या दिल्लीतील निवासस्थानी एका स्नेहभोजनाचे आयोजन केले होते. या कार्यक्रमाला विविध पक्षांच्या नेत्यांना निमंत्रित करण्यात आले होते. मात्र, सर्वांचे लक्ष वेधून घेतले ते शिवसेना ठाकरे गटाच्या दोन खासदारांच्या उपस्थितीने. हिंगोलीचे ठाकरेंच्या शिवसेनेचे खासदार नागेश आष्टीकर आणि यवतमाळ-वाशिम मतदारसंघाचे प्रतिनिधित्व करणारे ठाकरे गटाचे खासदार संजय देशमुख हे या डिनरला उपस्थित होते.

खासदार आपल्याकडे खेचण्यासाठी शिंदे गटाची रणनीती

महाराष्ट्रातील सत्तासंघर्षानंतर शिवसेना दोन गटांत विभागली गेली. त्यानंतर विधानसभेत शिंदेंनी आपले वर्चस्व सिद्ध केले असले, तरी लोकसभेत ठाकरे गटाचे काही खासदार अजूनही उद्धव ठाकरेंशी एकनिष्ठ आहेत. मात्र, आगामी निवडणुका आणि सर्वोच्च न्यायालयातील सुनावणीच्या पार्श्वभूमीवर, ठाकरे गटाचे हे खासदार आपल्याकडे खेचण्यासाठी शिंदे गटाने जी गुप्त रणनीती आखली आहे, त्याला ‘ऑपरेशन टायगर’ असे नाव देण्यात आले आहे.

ठाकरे गटाचे ६ आणि शरद पवार गटाचे ६ खासदार शिंदेच्या संपर्कात

या मोहिमेचं मुख्य उदिष्ट आहे संख्याबळ वाढवणे, शिंदे गटाचे सध्या ७ खासदार आहेत. ‘ऑपरेशन टायगर’ यशस्वी झाल्यास ही संख्या १९ पर्यंत नेण्याचे त्यांचे टार्गेट आहे. ठाकरे गटाचे ६ आणि शरद पवार गटाचे ६ खासदार शिंदेंच्या संपर्कात असल्याचे बोलले जात आहे. जास्तीत जास्त खासदार सोबत असल्यास पक्षाचे नाव आणि चिन्हावरील दावा अधिक भक्कम होतो, असा शिंदे गटाचा समज आहे.

ईडी, सीबीआय आणि सत्तेचा धाक दाखवून फोडाफोडीचे राजकारण

एवढंच नाही तर, पुढील लोकसभा निवडणुकीत जास्तीत जास्त जागांवर दावा सांगण्यासाठी हे ऑपरेशन महत्त्वाचे मानले जात आहे. या डिनर डिप्लोमसीनंतर महाराष्ट्रातील राजकीय वातावरण तापले असून दोन्ही बाजूंनी प्रतिक्रिया येत आहेत, मात्र संजय राऊत यांनी या सर्व चर्चा फेटाळून लावल्या आहेत. राऊत यांच्या मते, “आमचे सर्व खासदार एकनिष्ठ आहेत. ईडी, सीबीआय आणि सत्तेचा धाक दाखवून फोडाफोडीचे राजकारण सुरू आहे. पण आम्ही कधीही झुकणार नाही.

खासदारांच्या भेटीगाठी या केवळ विकासकामांच्या चर्चेसाठी

तर मंत्री उदय सामंत यांनी स्पष्ट केले की, खासदारांच्या भेटीगाठी या केवळ विकासकामांच्या चर्चेसाठी आहेत. ‘ऑपरेशन टायगर’ नावाचे कोणतेही अधिकृत ऑपरेशन नसल्याचा दावा त्यांनी केला आहे, तरीही लोक स्वतःहून शिंदेसाहेबांच्या कामावर विश्वास ठेवून येत असल्याचे त्यांनी नमूद केले. खासदार आष्टीकर यांनी ही भेट केवळ ‘शिष्टाचार’ असल्याचे म्हटले आहे. मतदारसंघातील कामांसाठी मंत्र्यांना भेटणे हे खासदाराचे कर्तव्य आहे, असे त्यांनी सांगितलंय.

सुत्रांच्या माहितीनुसार, भाजपच्या केंद्रीय नेतृत्वाने सध्या या फोडाफोडीला ‘ब्रेक’ लावला आहे. भाजपला वाटते की थेट फोडाफोडी करण्याऐवजी महायुतीतील मित्रपक्षांनी अधिक समन्वय राखावा. तसेच, शरद पवार गटाच्या खासदारांना शिंदे गटात घेण्यापेक्षा अजित पवार गटात किंवा थेट एनडीएमध्ये समाविष्ट करून घेण्याबाबत भाजप आग्रही असल्याचे समजते.

खासदार एकत्र ठेवण्याचे ठाकरेंसमोर मोठे आव्हान

दिल्लीतील या डिनर डिप्लोमसीमुळे उद्धव ठाकरे यांच्या समोर आपल्या खासदारांना एकत्र ठेवण्याचे मोठे आव्हान उभे राहिले आहे. जर खरोखरच ‘ऑपरेशन टायगर’ यशस्वी झाले, तर महाराष्ट्राच्या राजकारणात शिवसेना ठाकरे गटासाठी हा दुसरा मोठा धक्का ठरू शकतो. तूर्तास, खासदार आष्टीकर आणि संजय देशमुख यांनी जरी या भेटीला सदिच्छा भेट म्हटले असले, तरी राजकारणात अशा ‘भेटीं’चा अर्थ बराच खोल असतो, हे मात्र निश्चित.

ठाकरेंनी महायुतीची बलाढ्य ताकद असताना ९ खासदार निवडून आणले

अनेकदा शिवसेना फुटलेली राज्यानं पाहिलीय, यावेळी जेव्हा शिवसेना फुटली तेव्हा शिंदे थेट चिन्ह आणि पक्षच घेऊन गेले, त्यामुळे शिवसेनेसाठी हा सर्वात मोठा धक्का होता. त्यानंतर हळूहळू अनेक नेत्यांनी शिंदे गट गाठला, पण लोकसभेला ठाकरेंनी पुन्हा एकदा आपली ताकद दाखवून देत महायुतीची बलाढ्य ताकद असताना ९ खासदार निवडून आणले. जनता जरी ठाकरेंसोबत राहिली असली तरी नेत्यांचा काही भरोसा नाही, हे अनेकदा दिसून आलंय, यावेळी तरी ही सगळी चाहूल आधी लागल्यानंतर शिवसेना जागी होणार का आणि ठाकरे या फुटीच्या चर्चांना ब्रेक लावणार का? हे पाहणं महत्त्वाचं ठरणार आहे.