Narendra Modi 12 Years: पंतप्रधान नरेंद्र मोदी यांच्या कार्यकाळातील १२ वर्षांच्या कामगिरीचा गौरव करत महाराष्ट्र मंत्रिमंडळाने अभिनंदनाचा ठराव मंजूर केला. मुख्यमंत्री देवेंद्र फडणवीस यांनी यावेळी महाराष्ट्राला झालेल्या विकासकामांचा आणि विविध केंद्रीय योजनांच्या लाभांचा लेखाजोखा मांडला.
Devendra Fadnavis Highlights Modi Government’s 12-Year Journey : पंतप्रधान नरेंद्र मोदी यांच्या पंतप्रधानपदाच्या कार्यकाळाला १२ वर्षे पूर्ण झाल्याच्या पार्श्वभूमीवर महाराष्ट्र राज्य मंत्रिमंडळाच्या बैठकीत त्यांच्या अभिनंदनाचा ठराव मंजूर करण्यात आला. मुख्यमंत्री देवेंद्र फडणवीस यांनी मंत्रिमंडळाच्या बैठकीनंतर माध्यमांशी संवाद साधताना मोदी यांच्या नेतृत्वाखाली देशात आणि महाराष्ट्रात झालेल्या विविध विकासकामांचा (Maharashtra Cabinet Passes Resolution Congratulating Narendra Modi) आढावा घेतला. पायाभूत सुविधा, सिंचन, शेतकरी कल्याण, आरोग्य, महिला सक्षमीकरण आणि औद्योगिक विकास या क्षेत्रांतील योजनांचा उल्लेख करत त्यांनी केंद्र सरकारच्या कामगिरीची माहिती दिली.
‘प्रधानमंत्री नव्हे, प्रधानसेवक’; फडणवीसांनी सांगितला मोदींच्या कार्याचा प्रवास
मुख्यमंत्री देवेंद्र फडणवीस यांनी मोदी यांच्या कार्यपद्धतीचा उल्लेख करताना, ते स्वतःला प्रधानमंत्री नव्हे तर प्रधानसेवक मानतात, असे सांगितले. गरीब आणि वंचित घटकांना केंद्रस्थानी ठेवून विकास साधण्याची भूमिका मोदी यांनी घेतल्याचे त्यांनी नमूद केले. घर, वीज, पाणी, स्वच्छता आणि आरोग्य यांसारख्या मूलभूत सुविधा सर्वसामान्यांपर्यंत पोहोचवण्यावर सरकारने भर दिल्याचेही फडणवीस म्हणाले.
देशात ‘वन नेशन, वन टॅक्स’ संकल्पनेअंतर्गत जीएसटीची अंमलबजावणी, राम मंदिराचे निर्माण आणि जम्मू-काश्मीरमधील कलम ३७० हटवण्याचा निर्णय यांचा उल्लेखही त्यांनी केला. सर्जिकल स्ट्राइक, ऑपरेशन सिंदूर आणि संरक्षण क्षेत्रातील आत्मनिर्भरतेच्या प्रयत्नांचाही त्यांनी आढावा घेतला.
महाराष्ट्राला १२ लाख कोटींच्या पायाभूत सुविधा प्रकल्पांचा लाभ
महाराष्ट्राच्या विकासात केंद्र सरकारच्या योगदानाचा उल्लेख करताना फडणवीस यांनी सुमारे १२ लाख कोटी रुपयांच्या पायाभूत सुविधा प्रकल्पांचा दाखला दिला. मेट्रो, अटल सेतू, समृद्धी महामार्ग, बुलेट ट्रेन, जलसिंचन प्रकल्प आणि नवी मुंबई विमानतळ यांसारख्या प्रकल्पांचा त्यांनी उल्लेख केला.
रेल्वे मार्गांचे विद्युतीकरण, ग्रामीण भागातील रेल्वे सुविधांचा विस्तार आणि औद्योगिक विकासासाठी मिळालेल्या मदतीमुळे राज्याच्या अर्थव्यवस्थेला चालना मिळाल्याचे त्यांनी सांगितले. नाशिक, पुणे आणि नागपूर परिसरातील औद्योगिक विकास तसेच संरक्षण क्षेत्राशी संबंधित कॉरिडॉरच्या माध्यमातून रोजगार आणि उद्योगांना संधी उपलब्ध होत असल्याचेही त्यांनी नमूद केले.
शेतकऱ्यांसाठी सिंचन आणि सौरपंप योजनांवर भर
शेतकरी कल्याणाच्या योजनांचा उल्लेख करताना फडणवीस यांनी प्रधानमंत्री कृषी सिंचन योजना आणि बळीराजा संजीवनी योजनेची माहिती दिली. विदर्भ आणि मराठवाड्यासह राज्यातील सिंचन प्रकल्पांना निधी उपलब्ध झाल्याचे त्यांनी सांगितले. राज्यातील ९१ सिंचन प्रकल्प पूर्ण करण्यासाठी किंवा पुढे नेण्यासाठी केंद्र सरकारने मदत केल्याचा दावाही त्यांनी केला.
पीएम-कुसुम योजनेअंतर्गत शेतकऱ्यांना सौरपंप उपलब्ध करून देण्यात आल्याचे त्यांनी सांगितले. तसेच, पीएम किसान सन्मान निधी, किसान क्रेडिट कार्ड आणि इतर योजनांमधून शेतकऱ्यांना आर्थिक मदत मिळाल्याचा उल्लेख केला.
आयुष्मान भारतपासून पीएम आवासपर्यंत; योजनांचा लेखाजोखा
राज्यातील विविध केंद्रीय योजनांची आकडेवारी मांडताना फडणवीस यांनी पुढील बाबींचा उल्लेख केला.
आयुष्मान भारत: महाराष्ट्रात ४.४० कोटी आयुष्मान भारत कार्ड वितरित झाल्याचे त्यांनी सांगितले.
पीएम आवास योजना: राज्यात ४३ लाख घरे बांधली गेली किंवा बांधकामाच्या प्रक्रियेत असल्याची माहिती दिली.
जनधन योजना: सुमारे ३.४३ कोटी बँक खाती उघडण्यात आल्याचे नमूद केले.
पीएम मातृ वंदना योजना: २१ लाख ४६ हजार महिलांना लाभ मिळाल्याचे सांगितले.
पाणीपुरवठा योजना: सुमारे २९ हजार योजना पूर्ण झाल्याचा दावा केला.
स्वामित्व योजना: सुमारे ४० लाख नागरिकांना घराच्या मालकीसंदर्भातील कार्ड मिळाल्याचे सांगितले.
पीएम किसान योजना: सुमारे ९१ लाख शेतकऱ्यांना लाभ मिळाल्याचा उल्लेख केला.
पीएम पोषण योजना: बालकांना पोषण आहार उपलब्ध करून देण्यात आल्याचे नमूद केले.
या योजनांमुळे ग्रामीण भागातील नागरिक, शेतकरी, महिला आणि आर्थिकदृष्ट्या दुर्बल घटकांपर्यंत विविध सुविधा पोहोचल्याचे फडणवीस यांनी सांगितले.
छत्रपती शिवरायांच्या गड-किल्ल्यांचा जागतिक वारसा म्हणून गौरव
महाराष्ट्राच्या सांस्कृतिक आणि ऐतिहासिक वारशाचाही फडणवीस यांनी उल्लेख केला. छत्रपती शिवाजी महाराजांची राजमुद्रा नौदलाच्या ध्वजावर आणणे, त्यांच्या १२ गड-किल्ल्यांना जागतिक वारसा म्हणून स्थापित करण्याच्या प्रयत्नांचा आणि मराठी भाषेला अभिजात भाषेचा दर्जा मिळण्याचा त्यांनी गौरव केला.
याशिवाय, डॉ. बाबासाहेब आंबेडकर यांच्या इंदू मिल स्मारकासाठी जागा उपलब्ध करून देण्याच्या निर्णयाचाही उल्लेख केला. महात्मा ज्योतिराव फुले यांच्या २०० व्या जयंतीनिमित्त समतेच्या विचारांचा प्रसार करण्यासाठी देशभरात विविध उपक्रम राबवले जात असल्याचे त्यांनी सांगितले.
२०२९ पर्यंत महाराष्ट्राची अर्थव्यवस्था एक ट्रिलियन डॉलर करण्याचे लक्ष्य
भारताला पाच ट्रिलियन डॉलरची आणि महाराष्ट्राला एक ट्रिलियन डॉलरची अर्थव्यवस्था बनवण्याच्या दिशेने वाटचाल सुरू असल्याचे फडणवीस यांनी सांगितले. स्टार्टअप क्षेत्रातील महाराष्ट्राचे स्थान, औद्योगिक गुंतवणूक, पायाभूत सुविधांचा विस्तार आणि विविध कल्याणकारी योजनांचा उल्लेख करत त्यांनी राज्याच्या विकासाचा आढावा मांडला.
पंतप्रधान नरेंद्र मोदी यांच्या नेतृत्वाखाली भारत अधिक सुरक्षित, समृद्ध आणि आत्मनिर्भर बनवण्याच्या प्रयत्नांची दखल घेत राज्य मंत्रिमंडळाने अभिनंदनाचा ठराव मंजूर केला असून, त्यांच्या कार्याबद्दल आभार व्यक्त करण्यात आल्याचे मुख्यमंत्री देवेंद्र फडणवीस यांनी सांगितले.
