Stock Market Highlights Today : सलग तीन दिवसांच्या तेजीनंतर, बुधवार, 22 एप्रिल रोजी भारतीय शेअर बाजाराचे प्रमुख निर्देशांक घसरणीसह बंद झाले. बीएसई सेन्सेक्स 756.84 अंकांच्या मोठ्या घसरणीनंतर अखेर 78,516.49 वर बंद झाला. त्याचप्रमाणे, एनएसई निफ्टी 24,400 च्या पातळीखाली बंद झाला. निफ्टी देखील 198.50 अंकांनी घसरुन अखेर 24,378.10 वर स्थिरावला. मात्र, मिड-कॅप आणि स्मॉल-कॅप शेअर्समध्ये किंचित तेजी दिसून आली. निफ्टी मिडकॅप निर्देशांकात 0.2% ची वाढ झाली, तर स्मॉलकॅप निर्देशांकात 1% पेक्षा जास्त वाढ झाली.

हेही वाचा : मोठी बातमी! नेपाळ गृहमंत्र्यांनी सोडलं २६ दिवसांत पद, नेमकं कारण

रुपया 39 पैशांनी घसरुन बंद :

भारतीय रुपया सलग तिसऱ्या सत्रात दबावाखाली राहिला आणि बुधवारी अमेरिकन डॉलरच्या तुलनेत 39 पैशांनी घसरुन 93.83 (तात्पुरता) अंकांवर बंद झाला. व्यवहारादरम्यान, रुपया 23 मार्च रोजी दिसलेल्या 94 या महत्त्वपूर्ण पातळीच्या अगदी जवळ पोहोचला होता. परकीय चलन बाजारातील ही कमजोरी प्रामुख्याने जागतिक संकेतांमुळं होती. अमेरिका-इराण शांतता चर्चेभोवतीच्या अनिश्चिततेमुळं पश्चिम आशियातील तणाव कमी होण्याच्या आशा मावळल्या, ज्यामुळं कच्च्या तेलाच्या किमतीत मोठी वाढ झाली. वाढत्या तेलाच्या किमतींचा भारतासारख्या आयातदार देशांच्या चलनांवर थेट परिणाम होतो.

दोन सत्रांमध्ये वधारला होता रुपया :

याव्यतिरिक्त, देशांतर्गत शेअर बाजारातील मोठ्या विक्रीमुळं आणि परदेशी गुंतवणूकदारांकडून होणाऱ्या सततच्या भांडवली बहिर्वाहानेही रुपयावर दबाव आणला. आंतरबँक परकीय चलन बाजारात रुपया 93.69 वर उघडला आणि दिवसभरात घसरुन 93.87 च्या नीचांकी पातळीवर पोहोचला. अखेरीस तो मागील सत्रापेक्षा 39 पैशांनी घसरुन 93.83 वर बंद झाला. यापूर्वी मंगळवारी रुपया 28 पैशांनी घसरुन 93.44 वर बंद झाला होता आणि सोमवारी 25 पैशांनी कमजोर झाला होता. मात्र, मागील दोन सत्रांमध्ये रुपया एकूण 47 पैशांनी वधारला होता.