शिरूर| सचिन धुमाळ, प्रतिनिधी

Shirur Crime News: शिरूर, पुणे | शिरूर शहरातील लाटेआळी (Shirur Firing) आणि आंबेडकर नगर परिसरात आज सकाळी गोळीबाराची घटना घडल्याने शहरात खळबळ उडाली आहे. प्राथमिक माहितीनुसार, या घटनेत हरी गंगावणे या तरुणाचा गोळी लागल्याने जागीच मृत्यू झाला आहे. भरवस्तीत सकाळच्या सुमारास घडलेल्या या घटनेमुळे परिसरातील नागरिकांमध्ये भीतीचे वातावरण निर्माण झाले आहे.

मिळालेल्या माहितीनुसार, सकाळी साडेसहाच्या सुमारास परिसरात गोळीबाराचा आवाज झाला. त्यानंतर नागरिकांनी घटनास्थळी गर्दी केली. घटनेची माहिती मिळताच शिरूर पोलिसांनी तातडीने घटनास्थळी धाव घेतली. उपविभागीय पोलीस अधिकारी रवींद्र भोसले आणि शिरूर पोलीस ठाण्याचे पोलीस निरीक्षक विनोद पाटील यांच्या उपस्थितीत पोलिसांनी घटनास्थळाची पाहणी केली. (Shirur Pune News)

घटनास्थळी फॉरेन्सिक पथकही दाखल झाले असून, पोलिसांकडून पुरावे गोळा करण्याचे काम सुरू आहे. तपासादरम्यान पोलिसांना घटनास्थळी काही रिकामी काडतुसे आढळून आली असून ती जप्त करण्यात आली आहेत. गोळीबारात वापरण्यात आलेल्या शस्त्राचा प्रकार, हल्लेखोरांची ओळख आणि घटनेमागील नेमके कारण याबाबत पोलिसांकडून तपास केला जात आहे. (Shirur Breaking News)

हेही वाचा: काउंटडाऊन सुरू! दहावी-बारावीच्या परीक्षांच्या तारखा जाहीर; विद्यार्थ्यांनी असे करा अभ्यासाचे नियोजन

हा गोळीबार पूर्ववैमनस्यातून झाला की अन्य कोणत्या कारणामुळे, याबाबत अद्याप अधिकृत माहिती समोर आलेली नाही. त्यामुळे तपास पूर्ण होईपर्यंत घटनेचे कारण निश्चितपणे सांगता येणार नाही.

गोळीबाराची घटना

दरम्यान, काही दिवसांपूर्वी शिरूर-अहिल्यानगर जिल्ह्याच्या सीमेवरही गोळीबाराची घटना घडल्याची माहिती आहे. त्यामुळे परिसरातील कायदा व सुव्यवस्थेचा प्रश्न पुन्हा चर्चेत आला आहे.

सध्याच्या घटनेनंतर शिरूर शहरात पोलिसांची गस्त आणि तपासाची कार्यवाही वाढवण्यात आली आहे. या प्रकरणातील संशयितांचा शोध घेण्यासाठी पोलिसांकडून विविध दिशांनी तपास सुरू असून, अधिकृत तपशील तपासानंतर स्पष्ट होण्याची शक्यता आहे.