Rajgira Makhana Kheer Recipe: तुम्हीही नवरात्रोत्सवानिमित्त उपवास करत आहात का? रोज रोज साबुदाणा खिचडी खाऊन कंटाळा आला असेल, तर यंदा ट्राय करा राजगिऱ्याची पौष्टिक आणि चविष्ट खीर! ही खीर बनवायला अगदी सोपी असून चवीला देखील अप्रतिम लागते. चला तर मग, जाणून घेऊया याची झटपट रेसिपी!
Rajgira Makhana Kheer Recipe: नवरात्रीचे नऊ दिवस म्हणजे भक्ती, उपासना आणि उपवासाची (Navratri Fasting Recipe) खास पर्वणी! या काळात उपवास करताना काहीतरी चविष्ट खाण्याची (Navratri Special Food) इच्छा होतेच. मात्र दिवसभर उत्साह टिकवून ठेवण्यासाठी आणि भूक नियंत्रणात ठेवण्यासाठी पौष्टिक पदार्थांचा आहारात (Fasting Food Recipe) समावेश कारणंही तितकंच महत्वाचं आहे. अशा वेळी राजगिरा आणि मखान्याची खीर ( Rajgira- Makhana Kheer Recipe) हा एक उत्तम पर्याय ठरू शकतो. चवीला गोड, पोताने मऊ आणि सुकामेव्यामुळे अधिक रुचकर लागणारी ही खीर उपवासाच्या (Healthy Kheer Recipe) ताटाची रंगत वाढवेल.
विशेष म्हणजे, राजगिरा, दूध आणि मखाना यांचा वापर करून ही खीर घरच्या घरी सहज तयार करता येते. थोड्या साहित्यामध्ये तयार होणारी ही रेसिपी तुम्ही सकाळच्या उपवासाच्या नाश्त्यासाठी किंवा संध्याकाळी गोड खाण्याची इच्छा झाल्यावरही करू शकता. चला तर मग, जाणून घेऊया राजगिऱ्याची स्वादिष्ट खीर (Indian Dessert Recipe) बनवण्याची सोपी पद्धत!
राजगिऱ्याची खीर बनवण्यासाठी लागणारं साहित्य
राजगिरा – १ वाटी
मखाना – अर्धी वाटी
दूध – २ ते ३ वाट्या
पाणी – १ वाटी
साखर – अर्धी ते पाऊण वाटी (चवीनुसार)
तूप – २ ते ३ चमचे
वेलची पूड – अर्धा चमचा
केशर – २ ते ३ काड्या
बदाम, काजू आणि मनुका – आवडीनुसार
कृती
१. राजगिरा स्वच्छ करून भिजत ठेवा
सर्वप्रथम राजगिरा दोन ते तीन वेळा स्वच्छ पाण्याने धुऊन घ्या. त्यानंतर तो साधारण एक तास पाण्यात भिजत ठेवा. यामुळे राजगिरा शिजण्यास मदत होईल आणि खीर तयार करताना वेळही कमी लागेल.
२. मखान्याला द्या तुपाचा खमंग स्वाद
एका कढईत थोडं तूप गरम करून त्यामध्ये मखाना मंद आचेवर परतून घ्या. मखाना हलके कुरकुरीत झाल्यानंतर बाजूला काढून ठेवा.
३. राजगिरा व्यवस्थित शिजवून घ्या
आता कढईत एक वाटी पाणी गरम करा. पाण्याला उकळी येऊ लागल्यावर त्यामध्ये भिजवलेला राजगिरा आणि परतलेला मखाना घाला. कढईवर झाकण ठेवून मध्यम ते मंद आचेवर मिश्रण शिजू द्या. साधारण ५ ते ७ मिनिटांनंतर राजगिरा मऊ झाला आहे का, ते तपासा. गरजेनुसार शिजवण्याचा वेळ वाढवा.
४. दुधामुळे खिरीला येईल छान घट्टपणा
राजगिरा शिजल्यानंतर त्यामध्ये दूध घाला आणि मिश्रण चांगलं एकजीव करा. आता साखर, वेलची पूड आणि केशराच्या काड्या घालून मंद आचेवर ४ ते ५ मिनिटं शिजू द्या. खीर सतत हलवत राहा, म्हणजे ती कढईच्या तळाला लागणार नाही. खीर खूप घट्ट वाटल्यास आवश्यकतेनुसार थोडं दूध घालू शकता.
५. सुकामेवा घालून वाढवा खिरीची चव
शेवटी तुपामध्ये हलके परतलेले बदाम, काजू आणि मनुका खिरीत मिसळा. काही सुकामेवा सजावटीसाठी वरूनही घाला. तयार आहे तुमची सुगंधी, गोड आणि चविष्ट राजगिऱ्याची खीर!
उपवासात राजगिऱ्याची खीर खाण्याचे फायदे काय?
राजगिरा हा आहारात विविध प्रकारे समाविष्ट करता येणारा पौष्टिक धान्यसदृश पदार्थ आहे. त्यामध्ये प्रथिने, फायबर आणि काही महत्त्वाची खनिजे असतात. दुधामुळे खिरीत प्रथिने आणि कॅल्शियम मिळतात, तर सुकामेवा तिचं पोषणमूल्य आणि चव वाढवतो. त्यामुळे योग्य प्रमाणात खाल्ल्यास ही खीर उपवासाच्या आहारात ऊर्जा आणि पोषण देणारा पर्याय ठरू शकते.
मात्र, खिरीतील साखर, तूप आणि सुकामेव्याचं प्रमाण आपल्या गरजेनुसार ठरवा. मधुमेह किंवा इतर आरोग्यविषयक समस्या असल्यास आहाराचं प्रमाण वैयक्तिक गरजेनुसार ठेवणं महत्त्वाचं आहे.
खीर अधिक चविष्ट बनवण्यासाठी लक्षात ठेवा या टिप्स
खीर अधिक मलईदार हवी असल्यास दूध आधी थोडं आटवून घ्या.
खीर थंड झाल्यावर घट्ट होऊ शकते. पुन्हा गरम करताना थोडं दूध घाला.
उपवासासाठी पदार्थ तयार करताना तुमच्या घरातील उपवासाचे नियम पाळा आणि सर्व साहित्य त्यानुसार निवडा.
