Aditya Sikarwar: सोशल मीडियावर व्हायरल होण्यासाठी लोक वेगवेगळे प्रयोग करताना दिसतात. मात्र मध्य प्रदेशातील ग्वालियरमध्ये एका सोशल मीडिया इन्फ्लुएन्सरने केलेला प्रयोग त्यालाच चांगलाच महागात पडला.
गर्लफ्रेंडकडून कारवर तब्बल 3400 वेळा किस करून घेत त्याने त्याचा व्हिडिओ सोशल मीडियावर (Social Media) शेअर केला. व्हिडिओला मोठ्या प्रमाणात व्ह्यूज मिळाले, पण त्यानंतर पोलिसांनी त्याला चांगलाच धडा शिकवला.
मिळालेल्या माहितीनुसार, आदित्य सिकरवारला सोशल मीडियावर आपली लोकप्रियता वाढवायची होती. त्यासाठी त्याने काहीतरी वेगळं करण्याचा निर्णय घेतला. त्याच्या गर्लफ्रेंडने जवळपास चार तास कारच्या वेगवेगळ्या भागांवर किस केले. या किसचे लिपस्टिकचे ठसे संपूर्ण पांढऱ्या रंगाच्या कारवर उमटले होते.
आदित्यने या संपूर्ण प्रकाराचा व्हिडिओ शूट केला आणि तो सोशल मीडिया प्लॅटफॉर्मवर अपलोड केला. पाहता पाहता हा कंटेंट व्हायरल झाला. त्यातील एका व्हिडिओला लाखो व्ह्यूज मिळाल्याचा दावा करण्यात आला. कारवर सर्वत्र लाल रंगाचे लिपस्टिकचे ठसे दिसत असल्याने हा व्हिडिओ अनेकांचे लक्ष वेधून घेत होता.
हेही वाचा: ३५ आंदोलने, ९ उपोषणे आणि तरीही आरक्षणाचा प्रश्न कायम; जरांगे की सरकार, नेमकं चुकतंय कुठे?
मात्र व्हायरल होण्याचा आनंद फार काळ टिकला नाही. वाहतूक पोलिसांच्या निदर्शनास हा प्रकार आल्यानंतर आदित्यवर कारवाई करण्यात आली. त्याला ५,५०० रुपयांचा दंड ठोठावण्यात आल्याची माहिती आहे.
एवढ्यावरच कारवाई थांबली नाही. पोलिसांनी आदित्यलाच कार स्वच्छ करण्यास सांगितले. पाणी, बादली आणि कपडा घेऊन त्याला कारवरील लिपस्टिकचे डाग साफ करावे लागले. प्रत्येक ठसा पुसताना त्याला बराच वेळ कार घासावी लागली.
सोशल मीडिया प्रसिद्धीसाठी केलेला हा प्रयोग अखेर चांगलाच महागात पडल्याने आदित्यला पुन्हा असा प्रकार न करण्याचा इशारा देण्यात आला. या घटनेमुळे व्हायरल होण्याच्या नादात नियम आणि जबाबदारी विसरू नये, असा संदेशही चर्चेत आला आहे.
