Zhang Yiming: TikTokच्या यशानंतर AI क्षेत्रातही मोठी झेप घेत ByteDanceचे संस्थापक झांग यिमिंग यांनी संपत्तीत मोठी वाढ नोंदवली आहे. अवघ्या काही वर्षांत अब्जावधींची संपत्ती उभारणारे झांग यिमिंग नेमके कोण आहेत? जाणून घेऊया.
सोशल मीडिया प्लॅटफॉर्म TikTok मुळे जगभर ओळख निर्माण करणाऱ्याचे ByteDance चे संस्थापक झांग यिमिंग पुन्हा चर्चेत आले आहेत. त्यांच्या संपत्तीत झालेल्या मोठ्या वाढीमुळे आशियातील अब्जाधीशांच्या क्रमवारीतही बदल झाला आहे.
ब्लूमबर्गच्या अहवालानुसार, झांग यिमिंग (Zhang Yiming) यांची एकूण संपत्ती १०५ अब्ज डॉलरपेक्षा अधिक झाली आहे. या वाढीनंतर ते आशियातील सार्वधिक संपत्ती असलेल्या व्यक्तींच्या यादीत वरच्या स्थानावर पोहोचले आहेत. त्यांच्या संपत्तीच्या वाढीत ByteDance च्या वाढत्या मूल्याबरोबरच कंपनीच्या AI क्षेत्रातील विस्ताराचीही भूमिका असल्याचे सांगितले जात आहे.
हेही वाचा: रात्रीची ‘ही’ कॉमन सवय आरोग्यासाठी ठरू शकते धोकादायक? डॉक्टरांनी सांगितले कारण
काही दिवसांतच संपत्तीत कोट्यवधींची भर
झांग यिमिंग यांच्या संपत्तीचा प्रवास गेल्या काही वर्षांत वेगाने बदलला आहे. २०१९ मध्ये त्यांची संपत्ती सुमारे १३ अब्ज डॉलरच्या आसपास होती. त्यानंतर ByteDance च्या व्यवसायाचा विस्तार होत गेला आणि कंपनीच्या मूल्यांकनातही मोठे बदल झाले.
ब्लूमबर्गच्या आकडेवारीनुसार, याच महिन्यात झांग यांच्या संपत्तीत १२ अब्ज डॉलरहून अधिक वाढ झाली. ByteDance ही खासगी कंपनी असल्याने तिच्या मूल्यांकनाचा अंदाज विविध गुंतवणूक संस्थांकडून उपलब्ध आकडेवारीच्या आधारे घेतला जातो.
ByteDance आता फक्त TikTokपुरती मर्यादित नाही
ByteDance म्हटलं की सर्वप्रथम TikTok हे नाव समोर येतं. मात्र कंपनीचा व्यवसाय आता सोशल मीडिया प्लॅटफॉर्मपुरता मर्यादित राहिलेला नाही.
कंपनीने आर्टिफिशियल इंटेलिजन्सच्या क्षेत्रातही मोठी गुंतवणूक सुरू केली आहे. Doubao chatbot आणि Seedance सारख्या AI आधारित उत्पादनांमुळे ByteDance च्या टेक्नॉलॉजी पोर्टफोलिओमध्ये आणखी विस्तार झाला आहे.
AI क्षेत्रात जगभरात वाढत असलेली गुंतवणूक आणि या तंत्रज्ञानातील कंपन्यांचे वाढते मूल्यांकन ByteDance साठीही महत्त्वाचे ठरत आहे. याचा परिणाम कंपनीचे संस्थापक झांग यिमिंग यांच्या संपत्तीवर दिसून येत आहे.
अमेरिकेतील TikTok वादाचा परिणाम?
TikTok च्या व्यवसायाला अमेरिकेत गेल्या काही काळात नियामक आणि राजकीय अडचणींचा सामना करावा लागला आहे. कंपनीच्या मालकी आणि डेटा सुरक्षेशी संबंधित मुद्द्यांवरही चर्चा झाली.
या परिस्थितीतही ByteDance ने AI क्षेत्रातील आपला विस्तार सुरूच ठेवला. Omdia चे मुख्य विश्लेषक Lian Jye Su यांनी कंपनीच्या AI गुंतवणुकीकडे लक्ष वेधले आहे.
ByteDance कडे मोठ्या प्रमाणावर सोशल मीडिया डेटा उपलब्ध असल्याने भविष्यात AI तंत्रज्ञान विकसित करण्यासाठी त्याचा उपयोग होऊ शकतो, असे विश्लेषण करण्यात आले आहे.
झांग यिमिंग यांची संपत्ती कुठून येते?
झांग यिमिंग यांच्या संपत्तीचा सर्वात मोठा आधार ByteDance मधील त्यांचा हिस्सा आहे. ByteDance च्या मूल्यांकनात वाढ झाली की त्याचा परिणाम त्यांच्या अंदाजित नेटवर्थवरही होतो.
ब्लूमबर्ग बिलियनेअर्स इंडेक्समध्ये खासगी कंपन्यांच्या मूल्यांकनाचा विचार करताना वेगवेगळ्या जोखमींचाही समावेश केला जातो. ByteDance ही सूचीबद्ध कंपनी नसल्यामुळे तिच्या मूल्यांकनात विशिष्ट डिस्काउंट लागू केला जातो.
AI मुळे बदल
झांग यिमिंग यांच्या संपत्तीतील वाढ ही टेक्नॉलॉजी आणि AI क्षेत्राच्या वाढत्या आर्थिक प्रभावाचे आणखी एक उदाहरण मानली जात आहे. आता AI डिजिटल प्लॅटफॉर्म आणि टेक्नॉलॉजी कंपन्याही या समीकरणात महत्त्वाची भूमिका बजावत आहेत.
चीन आणि अमेरिका यांच्यात AI क्षेत्रात स्पर्धा वाढत असताना ByteDance सारख्या कंपन्यांचा पुढील विस्तार महत्त्वाचा ठरणार आहे. त्यामुळे भविष्यात कंपनीचे मूल्यांकन आणि झांग यिमिंग यांच्या संपत्तीतील बदलाकडेही लक्ष राहणार आहे.
