Gadchiroli: गडचिरोलीच्या धानोरा तालुक्यातील जपतलाई येथील अनुदानित आश्रमशाळेत धक्कादायक घटना घडली आहे. सर्पदंशाच्या संशयातून तीन विद्यार्थिनींचा मृत्यू झाल्याची प्राथमिक माहिती आहे.

गडचिरोली (Gadchiroli) जिल्ह्यातील धानोरा तालुक्यातून धक्कादायक घटना समोर आली आहे. जपतलाई येथील अनुदानित आश्रमशाळेतील तीन विद्यार्थिनींचा सर्पदंशाच्या संशयातून मृत्यू झाल्याची प्राथमिक माहिती आहे. या घटनेमुळे आश्रमशाळेतील विद्यार्थी, पालक आणि परिसरात एकच खळबळ उडाली असून भीतीचे वातावरण निर्माण झाले आहे.

हेही वाचा: कुणबी प्रमाणपत्रांवरून जरांगे पुन्हा आक्रमक; बावनकुळे-शिंदेंना थेट इशारा, नेमकं काय घडलं?

मिळालेल्या माहितीनुसार, ही घटना रात्रीच्या सुमारास घडल्याचे सांगण्यात येत आहे. सर्पदंशाची लक्षणे जाणवल्यानंतर संबंधित विद्यार्थिनींना उपचारासाठी रुग्णालयात दाखल करण्यात आले. उपचारादरम्यान दोन विद्यार्थिनींचा धानोरा येथे, तर एका विद्यार्थिनीचा गडचिरोली येथे मृत्यू झाल्याची प्राथमिक माहिती समोर आली आहे.

मृत विद्यार्थिनींपैकी दोन विद्यार्थिनी एटापल्ली तालुक्यातील, तर एक विद्यार्थिनी धानोरा तालुक्यातील असल्याचे समजते. या घटनेनंतर आश्रमशाळेतील इतर विद्यार्थिनींच्या सुरक्षेचा प्रश्नही ऐरणीवर आला आहे.

दरम्यान, काही विद्यार्थिनींना उपचारासाठी रुग्णालयात दाखल करण्यात आल्याची माहिती आहे. त्यांच्यावर वैद्यकीय उपचार सुरू आहेत. ही आश्रमशाळा एकात्मिक आदिवासी विकास प्रकल्प, गडचिरोली अंतर्गत येते. त्यामुळे या घटनेची प्रशासनाकडून गंभीर दखल घेतली जाण्याची शक्यता आहे.

सर्पदंशाची नेमकी घटना कशी घडली, विद्यार्थिनींना सर्पदंश झाला होता का, तसेच आश्रमशाळेच्या परिसरात सापांचा वावर आणि सुरक्षेच्या उपाययोजना याबाबत अद्याप अधिकृत माहिती समोर आलेली नाही. प्रशासनाकडून अधिकृत माहिती मिळाल्यानंतरच घटनेचे नेमके कारण स्पष्ट होणार आहे.

या दुर्दैवी घटनेमुळे परिसरात हळहळ व्यक्त होत असून, विद्यार्थिनींच्या सुरक्षिततेबाबत पालकांमध्येही चिंता निर्माण झाली आहे.