Ganpati Visarjan 2026 : गणेशोत्सवाचा उत्साह आता अंतिम टप्प्यात आला असून, उद्या शुक्रवार, २५ सप्टेंबर २०२६ रोजी अनंत चतुर्दशीला गणपती विसर्जन होणार आहे. दहा दिवस भक्तिभावाने बाप्पाची पूजा केल्यानंतर विसर्जनाच्या दिवशी गणरायाला विधिवत निरोप दिला जातो.

गणपती विसर्जनापूर्वी घरातील बाप्पाची पूजा, आरती आणि नैवेद्य करून कुटुंबीयांनी एकत्रितपणे गणरायाला निरोप देण्याची परंपरा आहे. विसर्जनासाठी बाहेर पडताना पर्यावरणाची काळजी घेणे आणि प्रशासनाने दिलेल्या नियमांचे पालन करणेही महत्त्वाचे आहे.

गणपती विसर्जनाच्या दिवशी काय करावे? ( Ganpati Visarjan 2026 )

विसर्जनाच्या दिवशी सकाळी किंवा आपल्या कुटुंबाच्या परंपरेनुसार बाप्पाची पूजा करावी. गणपतीला फुले, दुर्वा, नैवेद्य अर्पण करून आरती करावी. यानंतर घरातील सर्व सदस्यांनी बाप्पाला नमस्कार करून “गणपती बाप्पा मोरया, पुढच्या वर्षी लवकर या” असा जयघोष करत विसर्जनासाठी मूर्ती घेऊन जावी.

बाप्पाला निरोप देण्यापूर्वी आरती करा

गणपतीची अंतिम आरती करून त्यांना नैवेद्य दाखवावा. कुटुंबाच्या परंपरेनुसार पूजा-विधी पूर्ण केल्यानंतर मूर्ती विसर्जनासाठी न्यावी.

फुले, हार आणि इतर निर्माल्य पाण्यात टाकण्याऐवजी प्रशासनाने उपलब्ध करून दिलेल्या निर्माल्य संकलन केंद्रात जमा करावे. पुण्यात यासाठी मोठ्या प्रमाणात संकलन व्यवस्था करण्यात आली आहे.

पर्यावरणपूरक विसर्जनाला प्राधान्य द्या

शाडू मातीच्या मूर्तीचे कृत्रिम हौद किंवा प्रशासनाने उपलब्ध करून दिलेल्या विसर्जन व्यवस्थेत विसर्जन करणे हा पर्यावरणपूरक पर्याय आहे. पुण्यात नागरिकांकडून शाडू मातीच्या मूर्ती, सजावटीचा पुनर्वापर आणि निर्माल्याचे कंपोस्टिंग यासारख्या पर्यावरणपूरक पद्धतींना प्रोत्साहन मिळत आहे.

हेही वाचा : दगडूशेठ गणपतीची सांगता मिरवणूक २५ सप्टेंबरला; ‘श्री वक्रतुंड’ रथातून बाप्पाचे प्रस्थान

विसर्जनाच्या वेळी काय करू नये? ( Ganpati Visarjan )Ganpati Visarjan 2026 Date

• नदी, तलाव किंवा पाण्यात प्लास्टिक आणि निर्माल्य टाकू नये.
• फटाके किंवा धोकादायक वस्तू वापरू नयेत.
• गर्दीच्या ठिकाणी वाहन नेऊ नये.
• पोलिसांनी दिलेल्या वाहतूक सूचनांचे उल्लंघन करू नये.
• ध्वनिक्षेपक आणि ढोल-ताशांच्या आवाजाबाबतच्या नियमांचे उल्लंघन करू नये.

पुणे पोलिसांनी विसर्जन मिरवणुकीदरम्यान ध्वनीमर्यादा पाळण्याचे आवाहन केले आहे. ध्वनीपातळीवर लक्ष ठेवण्यासाठी अनेक ठिकाणी यंत्रणा तैनात करण्यात येणार आहे.

पुण्यात विसर्जनासाठी विशेष वाहतूक व्यवस्था

गणपती विसर्जन मिरवणुकांच्या पार्श्वभूमीवर पुण्यात अनेक प्रमुख रस्त्यांवर टप्प्याटप्प्याने वाहतूक बंद आणि वळवण्यात येणार आहे. लक्ष्मी रोड, शिवाजी रोड, बाजीराव रोड, कुमठेकर रोड, टिळक रोड, जेएम रोड, एफसी रोड यांसह अनेक मार्गांवर वाहतूक निर्बंध लागू करण्यात आले आहेत. तसेच जड वाहनांसाठी ४८ तासांचा निर्बंध जाहीर करण्यात आला आहे.

त्यामुळे विसर्जनासाठी बाहेर पडण्यापूर्वी आपल्या मार्गावरील वाहतूक व्यवस्था आणि पर्यायी मार्ग तपासणे महत्त्वाचे आहे.

बाप्पाला निरोप देताना ही प्रार्थना करा

“गणपती बाप्पा मोरया,
पुढच्या वर्षी लवकर या!
आमच्या कुटुंबावर सदैव
बाप्पाची कृपादृष्टी राहू दे.”

गणरायाला निरोप देताना भक्तांनी श्रद्धा, शिस्त आणि पर्यावरणाची काळजी या तिन्ही गोष्टींचा विचार करणे महत्त्वाचे आहे.

गणपती विसर्जन २०२६ : महत्त्वाची माहिती

विसर्जनाची तारीख: शुक्रवार, २५ सप्टेंबर २०२६
दिवस: अनंत चतुर्दशी