Maharashtra Government Recruitment: राज्यातील भरती परीक्षांमधील गैरप्रकारांना आळा घालण्यासाठी राज्य सरकारने मोठा निर्णय घेतला आहे.

राज्यातील विविध भरती परीक्षा अधिक पारदर्शक, सुरक्षित आणि गैरप्रकारमुक्त करण्यासाठी राज्य सरकारने महत्त्वाचे पाऊल उचलले आहे. भरती प्रक्रियेतील संभाव्य गैरप्रकारांना आळा घालण्यासाठी उच्चस्तरीय टास्कफोर्स गठीत करण्याचे आदेश मुख्यमंत्री यांनी दिले आहेत. या टास्कफोर्सच्या माध्यमातून परीक्षा प्रक्रियेतील त्रुटी, सुरक्षा व्यवस्था आणि उमेदवारांच्या अडचणींचा सखोल आढावा घेतला जाणार आहे.

या टास्कफोर्सच्या अध्यक्षपदी व्ही. राधा यांची नियुक्ती करण्यात आली आहे. राज्य शासनाकडून एकूण 7 अधिकाऱ्यांची समिती गठीत करण्यात आली असून, राज्याचे पोलीस महासंचालक सदानंद दाते यांचाही या टास्कफोर्समध्ये समावेश आहे. परीक्षा प्रक्रियेत सुरक्षेच्या दृष्टीने आवश्यक उपाययोजना निश्चित करण्यासाठी समिती विविध पातळ्यांवर माहिती संकलित करणार आहे.

हेही वाचा: स्वस्तात मस्त शॉपिंग! गणपती असो वा दिवाळी, मुंबई-पुणेकरांसाठी ‘हे’ मार्केट ठरतंय खास!

सहा महसुली विभागांचा दौरा

टास्कफोर्स राज्यातील सहा महसुली विभागांना भेटी देणार आहे. पुणे, नागपूर, नाशिक यांच्यासह राज्यातील सहा विभागांमध्ये समितीचा दौरा होणार असून, त्याचे वेळापत्रकही जाहीर करण्यात आले आहे. या दौऱ्यात परीक्षा केंद्रांची सुरक्षा, प्रश्नपत्रिका वितरण आणि परीक्षा आयोजनाची पद्धत यांचा आढावा घेतला जाण्याची शक्यता आहे.

उमेदवारांशी थेट संवाद

या दौऱ्याचे आणखी एक महत्त्वाचे वैशिष्ट्य म्हणजे टास्कफोर्सकडून उमेदवारांशी थेट संवाद साधला जाणार आहे. परीक्षा देताना उमेदवारांना येणाऱ्या अडचणी, परीक्षा व्यवस्थेतील त्रुटी तसेच पारदर्शकतेबाबतच्या त्यांच्या अपेक्षा जाणून घेतल्या जातील.

भरती प्रक्रियेवरील उमेदवारांचा विश्वास अधिक मजबूत करण्यासाठी त्यांच्या सूचनांचा विचार केला जाणार आहे. टास्कफोर्सच्या पाहणी आणि संवादातून प्राप्त होणाऱ्या माहितीच्या आधारे परीक्षा व्यवस्था अधिक सुरक्षित करण्यासाठी आवश्यक उपाययोजना सुचवल्या जाण्याची शक्यता आहे.

राज्यातील सरकारी भरती प्रक्रियेत पारदर्शकता आणि विश्वासार्हता वाढवण्याच्या दृष्टीने या टास्कफोर्सचा दौरा महत्त्वाचा मानला जात आहे.