अहमदाबाद MI Beat GT : इंडियन प्रीमियर लीग २०२६ चा ३१ वा सामना आज, २० एप्रिल रोजी अहमदाबाद येथील नरेंद्र मोदी स्टेडियमवर गुजरात टायटन्स आणि मुंबई इंडियन्स यांच्यात खेळला गेला. मुंबई इंडियन्सने हा सामना ९९ धावांनी जिंकला. मुंबई इंडियन्सने गुजरातवर मोठा विजय नोंदवला, ज्यामुळे त्यांना नेट रन रेटच्या बाबतीत फायदा झाला. सलग चार पराभवांनंतर मुंबई इंडियन्सचा हा पहिला विजय होता. या हंगामातील हा मुंबई इंडियन्सचा दुसरा विजय होता. त्यांचे ४ गुण झाले आहेत. आता, आयपीएल २०२६ च्या गुणतालिकेत मुंबई ७ व्या स्थानावर घसरली आहे.

हेही वाचा : भयंकर! अमेरिका-इस्रायल, इराण युद्धात आतापर्यंत 3300 हून अधिक लोकांचा मृत्यू

गुजरात टायटन्सची फलंदाजी पूर्णपणे अपयशी :

२०० धावांचे लक्ष्य गाठताना गुजरात टायटन्सची फलंदाजी पूर्णपणे अपयशी ठरली. ते १५.४ षटकांत १०० धावांवर सर्वबाद झाले. गुजरात टायटन्सकडून वॉशिंग्टन सुंदरने सर्वाधिक २६ धावा केल्या. इतर कोणताही खेळाडू २० धावांचा टप्पा ओलांडू शकला नाही. मुंबई इंडियन्सकडून अश्विनी कुमारने सर्वाधिक ४ बळी घेतले. मिचेल सँटनर आणि अल्लाह गझनफर यांनी प्रत्येकी दोन बळी घेतले. हार्दिक पांड्या आणि जसप्रीत बुमराह यांनीही प्रत्येकी एक बळी घेतला.

तिलक वर्माने झळकावलं धमाकेदार शतक :

तिलक वर्माच्या नाबाद शतकाच्या जोरावर मुंबई इंडियन्सने सोमवारी इंडियन प्रीमियर लीगमध्ये गुजरात टायटन्सविरुद्ध १९९ धावांपर्यंत मजल मारली. आपले पहिले आयपीएल शतक झळकावणाऱ्या तिलकने ४५ चेंडूंमध्ये आठ चौकार आणि सात षटकारांसह नाबाद १०१ धावा केल्या. त्याने कर्णधार हार्दिक पांड्यासोबत (१५ धावा, १६ चेंडू, एक चौकार) पाचव्या विकेटसाठी ८१ धावा आणि नमन धीरसोबत (४५) चौथ्या विकेटसाठी ५२ धावांची भागीदारी केली.