Jantar Mantar Protest: दिल्लीतील जंतर-मंतर येथे सुरू असलेल्या आंदोलनाला दिवसेंदिवस नवे वळण मिळत आहे. अभिजित दिपके यांच्या अन्नत्याग उपोषणाचा आज (१९ जुलै) दुसरा दिवस असून, दुसरीकडे रुग्णालयात दाखल असलेले सोनम वांगचुक यांचेही उपोषण सुरूच आहे. त्यांच्या उपोषणाचा आज २२ वा दिवस असल्याचे सांगितले जात आहे. दरम्यान, पोलिसांकडून आंदोलकांना जंतर-मंतरवरून हटवले जाईल, या भीतीने मोठ्या संख्येने विद्यार्थी रात्रभर आंदोलनस्थळी ठाण मांडून बसले होते.
अभिजित दिपके यांनी सोनम वांगचुक यांच्या उपोषणाची धुरा पुढे नेत अन्नत्याग उपोषण सुरू केले आहे. त्यांच्या उपोषणाला विविध राज्यांतील विद्यार्थी आणि सामाजिक कार्यकर्त्यांचा पाठिंबा मिळत असून, आंदोलनस्थळी दिवसभर घोषणाबाजी आणि शांततापूर्ण आंदोलन सुरू आहे.
दुसरीकडे, सोनम वांगचुक यांना पोलिसांनी आंदोलनस्थळावरून ताब्यात घेऊन रुग्णालयात दाखल केल्यानंतर तेथूनच त्यांनी उपोषण सुरू ठेवले आहे. त्यामुळे आंदोलनाची तीव्रता कायम असून, त्यांच्या समर्थकांमध्येही मोठी अस्वस्थता आहे.
दरम्यान, पोलिसांकडून आज जंतर-मंतरवरील आंदोलन हटवण्याची शक्यता व्यक्त केली जात असल्याने आंदोलक विद्यार्थ्यांनी संपूर्ण रात्र जागून काढली. आज सकाळीही मोठ्या संख्येने विद्यार्थी जंतर-मंतरवर उपस्थित असून, आंदोलन कायम ठेवण्याचा निर्धार त्यांनी व्यक्त केला आहे.
उद्या संसदेचे अधिवेशन सुरू होणार असल्याने आंदोलक संसदेवर मोर्चा काढण्याच्या भूमिकेवर ठाम असल्याची माहिती समोर येत आहे. त्यामुळे दिल्लीतील आंदोलनाला पुढील काही दिवसांत आणखी वेग येण्याची शक्यता व्यक्त केली जात आहे.
