MH 12 RTO Code: पुणेकरांसाठी दिलासादायक बातमी समोर आली आहे. वाहनांच्या नंबर प्लेटवर दिसणारा MH 12 हा आरटीओ कोड कायम राहणार असून, नवीन वाहन नोंदणी मालिकेबाबत सुरू असलेल्या चर्चांना आता पूर्णविराम मिळण्याची शक्यता आहे.
पुण्याची ओळख बनलेला MH 12 आरटीओ कोड (MH 12 RTO Code) पुढेही कायम राहणार असल्याचे स्पष्ट झाले आहे. पुणे आरटीओमध्ये नवीन वाहन नोंदणीसाठी सध्या MH 12 ZZ ही शेवटची मालिका सुरू असून ती संपत आल्याने पुढील पर्यायी नोंदणी मालिकेबाबत प्रक्रिया सुरू करण्यात आली होती. त्यामुळे पुण्याचा आरटीओ कोड बदलला जाणार असल्याची चर्चा रंगली होती.
मात्र, पुणेकरांच्या भावना आणि शहराची ओळख लक्षात घेऊन हा कोड कायम ठेवण्याची मागणी करण्यात आली. अनेक नागरिकांनीही MH 12 हा कोड बदलू नये, अशी भूमिका घेतली होती. (Pune RTO)
या पार्श्वभूमीवर केंद्रीय नागरी उड्डाण राज्यमंत्री मुरलीधर मोहोळ यांनी केंद्रीय रस्ते वाहतूक आणि महामार्ग मंत्री नितीन गडकरी यांची भेट घेतली. यावेळी त्यांनी पुण्याची ओळख असलेला MH 12 कोड कायम ठेवण्याची विनंती केली तसेच याच कोडअंतर्गत पुढील पर्यायी वाहन नोंदणी मालिका सुरू करण्यासाठी आवश्यक निर्णय घेण्याची मागणी केली. (Vehicle Registration Rules)
या मागणीला सकारात्मक प्रतिसाद देत नितीन गडकरी यांनी MH 12 आरटीओ कोड कायम ठेवण्यासाठी आवश्यक त्या सूचना दिल्या जातील, अशी ग्वाही दिली.
यामुळे पुणेकरांसाठी मोठा दिलासा मिळाला आहे. शहराची वेगळी ओळख बनलेला MH 12 आरटीओ कोड यापुढेही कायम राहण्याची शक्यता अधिक बळकट झाली असून, वाहनधारकांमध्ये समाधानाचे वातावरण आहे.
