Ganpati Idol Buying Tips: गणेशोत्सवाला आता काहीच दिवस शिल्लक असून, बाप्पाच्या आगमनाची तयारी घराघरांत सुरू झाली आहे. गणरायाच्या स्वागतासाठी सजावट, पूजेचे साहित्य आणि नैवेद्याची तयारी केली जात आहे. याचबरोबर अनेकजण बाप्पाची नवीन मूर्ती खरेदी करण्यासाठी बाजारपेठेत गर्दी करत आहेत.

यंदा १४ सप्टेंबर २०२६ रोजी गणरायाचे आगमन होणार आहे. काही घरांमध्ये दीड दिवस, तर काही ठिकाणी पाच, सात किंवा दहा दिवस बाप्पाची प्रतिष्ठापना केली जाते. मात्र मूर्ती घरी आणण्यापूर्वी तिचा आकार, स्वरूप आणि ठेवण्याची जागा याबाबत काही पारंपरिक गोष्टी लक्षात घेतल्या जातात. तुम्हीही यंदा गणपतीची मूर्ती खरेदी (Ganpati idol buying tips)  करणार असाल, तर या गोष्टी जाणून घ्या.

हेही वाचा: काळी मारबत, पिवळी मारबत अन् बडगे… नागपूरची १४५ वर्षांची ‘रहस्यमय’ परंपरा नेमकी काय?

गणपतीची मूर्ती कशी निवडावी?

सोंडेची दिशा

परंपरागत मान्यतेनुसार घरातील गणपतीसाठी डावीकडे वळलेली सोंड असलेली मूर्ती निवडण्याला प्राधान्य दिले जाते. अशा मूर्तीला घरगुती पूजेसाठी शुभ मानले जाते. उजवीकडे वळलेल्या सोंडेच्या मूर्तीची पूजा विशिष्ट पद्धतीने केली जाते, अशी धार्मिक मान्यता आहे.

बसलेली मूर्ती का निवडतात?

घरातील गणपतीसाठी बसलेल्या अवस्थेतील मूर्ती शुभ मानण्याची परंपरा आहे. बाप्पाचे प्रसन्न आणि शांत स्वरूप असलेली मूर्ती घरातील पूजेसाठी निवडावी, अशीही मान्यता आहे. त्यामुळे मूर्ती खरेदी करताना तिच्या आसनाकडेही लक्ष द्या.

मूर्तीचे स्वरूप

गणपतीची मूर्ती प्रसन्न, सुबक आणि कुठेही तडा किंवा तुटलेला भाग नसलेली असावी. मूर्तीमध्ये गणपतीचे पारंपरिक स्वरूप स्पष्ट दिसत आहे का, हे पाहणे महत्त्वाचे आहे. रंग निवडताना आपल्या आवडीनुसार आणि घराच्या सजावटीला अनुरूप मूर्ती निवडता येते.

बाप्पाची स्थापना कुठे करावी?

परंपरेनुसार घरातील स्वच्छ, शांत आणि पूजेसाठी योग्य जागी गणपतीची स्थापना केली जाते. अनेक कुटुंबांमध्ये पूर्व किंवा ईशान्य दिशेला असलेल्या पूजास्थळाला प्राधान्य दिले जाते. मात्र घराची रचना आणि उपलब्ध जागा लक्षात घेऊन सुरक्षित आणि स्वच्छ ठिकाणी बाप्पाची प्रतिष्ठापना करणे महत्त्वाचे आहे.

गणपतीच्या पूजेसाठी काय तयारी करावी?

बाप्पाच्या स्थापनेपूर्वी पूजेची सर्व सामग्री तयार ठेवावी. स्वच्छ वस्त्र, फुले, दुर्वा, नैवेद्य, धूप-दीप आणि आरतीचे साहित्य आधीच तयार ठेवले तर ऐनवेळी धावपळ होत नाही. गणरायाला मोदक किंवा आपल्या परंपरेनुसार आवडता नैवेद्य अर्पण करून पूजा आणि आरती केली जाते.

मूर्ती खरेदी करताना ‘ही’ गोष्ट लक्षात ठेवा

गणपतीची मूर्ती खरेदी करताना केवळ तिचे सौंदर्य पाहण्यापेक्षा मूर्ती पर्यावरणपूरक आहे का, ती सुस्थितीत आहे का आणि आपल्या घरातील पूजास्थळासाठी योग्य आकाराची आहे का, हे नक्की तपासा. श्रद्धेसोबत पर्यावरणाची काळजी घेतली, तर गणरायाचा उत्सव आणखी अर्थपूर्ण होईल.