Mumbai Ganpati Visarjan 2026 : गणेशोत्सवाच्या उत्साहात मुंबईत बाप्पाच्या विसर्जनाला वेग आला आहे. मुंबई महानगरपालिकेने दिलेल्या आकडेवारीनुसार, गणेशोत्सवाच्या सहाव्या दिवशी म्हणजेच 20 सप्टेंबर 2026 रोजी सकाळी 6 वाजेपर्यंत मुंबईतील विविध विसर्जनस्थळी तब्बल 44,261 गणपती आणि गौरी मूर्तींचे विसर्जन करण्यात आले.
38 हजारांहून अधिक घरगुती गणपतींचे विसर्जन
या आकडेवारीमध्ये सर्वाधिक संख्या घरगुती गणपतींची आहे. BMCच्या माहितीनुसार, आतापर्यंत 38,438 घरगुती गणपती मूर्तींचे विसर्जन करण्यात आले आहे. गणेशभक्तांनी पारंपरिक पद्धतीने बाप्पाला निरोप दिला.
5,518 गौरी मूर्तींचाही समावेश
गणपतीसोबत गौरी विसर्जनालाही मोठे महत्त्व आहे. उपलब्ध आकडेवारीनुसार 5,518 गौरी मूर्तींचे विसर्जन करण्यात आले आहे. यामुळे एकूण विसर्जनाचा आकडा 44 हजारांच्या पुढे गेला आहे.
सार्वजनिक गणेश मंडळांच्या 305 मूर्तींचे विसर्जन
मुंबईतील सार्वजनिक गणेश मंडळांच्याही मूर्तींचे विविध दिवशी विसर्जन केले जात आहे. सहाव्या दिवसाच्या आकडेवारीत 305 सार्वजनिक गणेश मंडळांच्या मूर्तींचा समावेश आहे.
हेही वाचा : लालबागच्या राजाच्या दरबारात गरीब-श्रीमंत भेद? सामान्य भक्तांचा सवाल नेमका काय?
दीड दिवसातच 61 हजारांहून अधिक मूर्तींचे विसर्जन
मुंबईत गणेशमूर्तींचे विसर्जन वेगवेगळ्या दिवशी करण्याची परंपरा आहे. दीड दिवसाच्या विसर्जन कालावधीतच 61,640 गणपती मूर्तींचे विसर्जन झाले होते. त्यात 61,247 घरगुती गणपती, 301 सार्वजनिक मंडळांच्या मूर्ती आणि 92 हरितालिका मूर्तींचा समावेश होता.
पाचव्या दिवशी 37,843 मूर्तींचे विसर्जन
पाचव्या दिवशीही मुंबईत मोठ्या प्रमाणावर विसर्जन झाले. BMCच्या आकडेवारीनुसार, त्या कालावधीत 37,843 मूर्तींचे विसर्जन झाले. यामध्ये 35,843 घरगुती गणपती, 1,030 सार्वजनिक मंडळांच्या मूर्ती आणि 129 हरितालिका मूर्तींचा समावेश होता.
विसर्जनासाठी BMCची विशेष व्यवस्था ( Mumbai Ganpati Visarjan 2026 )
मुंबईतील विविध विसर्जनस्थळी BMCकडून आवश्यक व्यवस्था करण्यात आली आहे. नैसर्गिक विसर्जनस्थळांसोबत कृत्रिम तलावांचीही व्यवस्था करण्यात आली असून, भाविक आणि गणेश मंडळांच्या मिरवणुका व्यवस्थित पार पडाव्यात यासाठी प्रशासनाकडून नियोजन करण्यात आले आहे. सहाव्या दिवसाच्या या विसर्जन प्रक्रियेत कोणतीही अनुचित घटना घडली नसल्याची माहिती अधिकाऱ्यांनी दिली आहे.
25 सप्टेंबरला अनंत चतुर्दशी
यंदाचा गणेशोत्सव 14 सप्टेंबरपासून सुरू झाला असून 25 सप्टेंबरला अनंत चतुर्दशीला मुख्य विसर्जनाचा दिवस असेल. त्यामुळे आगामी काळात मुंबईतील विसर्जनाची संख्या आणखी मोठ्या प्रमाणात वाढण्याची शक्यता आहे.
