Sunetra Pawar political move : विमान अपघातात दादा गेले आणि राष्ट्रवादीची (Nationalist Congress Party) जबाबदारी सुनेत्रा पवारांच्या खांद्यावर आली. मात्र काही दिवसांतच सुनेत्रा पवारांना पटेल-तटकरे ही जोडगोळी भारी पडत असल्याची चर्चा रंगली. त्यानंतर सुनेत्रा पवारांनीही डाव टाकला आणि पटेल तटकरेंची (Praful Patel, Sunil Tatkare) नावं कार्यकारिणीतून गायब झाली. मग काय पटेल तटकरे आणि सुनेत्र पवार (Sunetra Pawar) यांच्या सुप्त संघर्षाच्या चर्चा रंगू लागल्या. मात्र सुनेत्रा पवारांनी अतिशय सावध भूमिका घेत ही टायपिंग मिस्टेक असल्याचं सांगितलं. त्यानंतर यादी पुन्हा पाठवण्यात आली, पण या यादीत नावं होती, पटेल-तटकरेंच्या नावासमोर पद नव्हतं. त्यामुळे हा वाद आणखीच पेटला आणि पटेल-तटकरे 22 आमदार घेऊन भाजपात जातील असा दावाच रोहित पवारांनी केला. मग काय राष्ट्रवादीत घडामोडींना वेग आला, आता हा वाद कायमचा मिटवण्यासाठी सुनेत्रा पवारांनी नवा डाव टाकला असल्याचे बोलले जात आहे. पटेल-तटकरेंच्या जागी बदली जोडी नियुक्त करण्याची तयारी पक्षाने दाखवल्याचे दिसून येत आहे.

राष्ट्रवादी काँग्रेस पक्षाच्या राष्ट्रीय कार्यकारिणीत वरिष्ठ नेते हसन मुश्रीफ आणि धनंजय मुंडे यांना महत्त्वाची संघटनात्मक पदे देऊन सामावून घेतले जाणार असून, पक्षात उफाळलेले अंतर्गत नाराजीनाट्य शमवण्यासाठी प्रफुल्ल पटेल आणि सुनील तटकरे यांनी राष्ट्रीय अध्यक्षा सुनेत्रा पवार यांच्याशी सविस्तर चर्चा केली आहे. अजित पवार यांच्या निधनानंतर पक्षाची विस्कटलेली घडी पुन्हा नव्याने बसवण्यासाठी आणि पक्षांतर्गत असंतोष संपवण्यासाठी हा अत्यंत महत्त्वपूर्ण राजकीय निर्णय घेण्यात येत आहे. २९ एप्रिल २०२६ रोजी केंद्रीय निवडणूक आयोगाला पाठवलेल्या अधिकृत यादीत प्रफुल्ल पटेल, सुनील तटकरे आणि छगन भुजबळ यांसारख्या अतिवरिष्ठ नेत्यांच्या नावांचा तसेच पदांचा उल्लेख नसल्याने पक्षात मोठी खळबळ उडाली होती.

जुन्या आणि नव्या नेत्यांमध्ये समन्वय साधण्यासाठी राष्ट्रीय कार्यकारिणीचा विस्तार

ही केवळ एक तांत्रिक आणि लिपिकीय चूक असल्याचे स्पष्टीकरण राष्ट्रीय अध्यक्षा सुनेत्रा पवार यांनी दिले असून, जुन्या आणि नव्या नेत्यांमध्ये समन्वय साधण्यासाठी राष्ट्रीय कार्यकारिणीचा विस्तार करून नवी सुधारित यादी निवडणूक आयोगाकडे पाठवण्याची तयारी आता अंतिम टप्प्यात आली आहे. फेब्रुवारी २०२६ मध्ये वरळी येथील राष्ट्रीय कार्यकारिणीच्या बैठकीत सुनेत्रा पवार यांची पक्षाच्या राष्ट्रीय अध्यक्षपदी एकमताने निवड करण्यात आली. परंतु, गेल्या काही दिवसांत पक्षाच्या नव्या रचनेवरून जुने वरिष्ठ नेते आणि पवार कुटुंबातील तरुण पिढी यांच्यात शीतयुद्ध सुरू असल्याच्या चर्चा राजकीय वर्तुळात रंगू लागल्या होत्या. हा वाद तेव्हा अधिक तीव्र झाला जेव्हा राष्ट्रवादी काँग्रेसने निवडणूक आयोगाला २२ सदस्यांची नवीन राष्ट्रीय कार्यकारिणीची यादी सादर केली.

पक्षाची संपूर्ण प्रशासकीय, संघटनात्मक आणि आर्थिक सूत्रे पवार कुटुंबाच्या हाती

सोशल मीडियावर आणि माध्यमांमध्ये ही यादी व्हायरल झाल्यानंतर पक्षात मोठी खळबळ उडाली. या यादीत पक्षाचे कार्यकारी अध्यक्ष प्रफुल्ल पटेल आणि महाराष्ट्र प्रदेशाध्यक्ष सुनील तटकरे यांच्या संघटनात्मक पदांचा कुठेही उल्लेख नव्हता. या उलट, सुनेत्रा पवार यांचे सुपुत्र पार्थ पवार यांना पक्षाचे राष्ट्रीय सरचिटणीस आणि जय पवार यांना राष्ट्रीय सचिव व शिस्तपालन समितीचे प्रमुख म्हणून नियुक्त करण्यात आले होते. पक्षाची संपूर्ण प्रशासकीय, संघटनात्मक आणि आर्थिक सूत्रे अप्रत्यक्षपणे पवार कुटुंबातील तरुण नेत्यांच्या हाती गेल्याचे या यादीवरून दिसून येत होते. यामुळे छगन भुजबळ, दिलीप वळसे पाटील, हसन मुश्रीफ आणि धनंजय मुंडे यांसारख्या ज्येष्ठ नेत्यांमध्ये तीव्र अस्वस्थता पसरली होती.

आनंद परांजपे यांच्या राजीनाम्यामुळे नाराजीला अधिक बळ

राष्ट्रीय कार्यकारिणीच्या यादीतून ज्येष्ठ नेत्यांची नावे गायब झाल्याची बातमी वाऱ्यासारखी पसरताच विरोधी पक्षांनी आणि राजकीय विश्लेषकांनी राष्ट्रवादीवर जोरदार टीका करण्यास सुरुवात केली. अजित पवार यांच्यानंतर ज्येष्ठ नेत्यांना पद्धतशीरपणे बाजूला सारून पक्षात घराणेशाही मजबूत केली जात असल्याचा आरोप करण्यात आला. पक्षाचे ठाण्यातील ज्येष्ठ नेते आनंद परांजपे यांच्या राजीनाम्यामुळे या नाराजीला अधिक बळ मिळाले. ज्यामुळे पक्षात राजीनाम्यांचे सत्र सुरू होण्याची भीती निर्माण झाली. वाढता वाद आणि नेत्यांमधील अस्वस्थता लक्षात घेऊन राष्ट्रीय अध्यक्षा सुनेत्रा पवार यांनी तात्काळ समाजमाध्यमांद्वारे आणि अधिकृत निवेदनाद्वारे यावर पडदा टाकण्याचा प्रयत्न केला. निवडणूक आयोगाला पाठवलेल्या यादीत ज्येष्ठ नेत्यांची नावे किंवा पदे न दिसणे ही केवळ एक “तांत्रिक आणि लिपिकीय चूक” होती, असे स्पष्टीकरण त्यांनी दिले.

प्रफुल्ल पटेल आणि सुनील तटकरे यांनी राष्ट्रीय अध्यक्षा सुनेत्रा पवार यांची भेट

पक्षाचे प्रवक्ते उमेश पाटील यांनीही पत्रकार परिषद घेऊन स्पष्ट केले की, प्रफुल्ल पटेल आणि सुनील तटकरे हे पक्षाचे सर्वोच्च नेते असून ते आपापल्या पदांवर कायम आहेत आणि त्यांच्या अधिकारांमध्ये कोणतीही कपात करण्यात आलेली नाही. पक्षाची विस्कटलेली घडी पुन्हा नव्याने बसवण्यासाठी आणि अंतर्गत संघर्ष पूर्णपणे मिटवण्यासाठी नुकतीच प्रफुल्ल पटेल आणि सुनील तटकरे यांनी राष्ट्रीय अध्यक्षा सुनेत्रा पवार यांची भेट घेतली. या बैठकीत पक्षाच्या आगामी रणनीतीवर, संघटनात्मक फेरबदलांवर आणि नवीन सुधारित यादीवर सविस्तर चर्चा झाली.

हसन मुश्रीफ आणि धनंजय मुंडे यांना तळागाळातील जनाधार

सुनील तटकरे यांनी माध्यमांशी संवाद साधताना स्पष्ट केले की, “पक्ष चालवताना किंवा मोठी संघटनात्मक बांधणी करताना काही तांत्रिक आणि अंतर्गत मुद्दे उपस्थित होतात. परंतु, पक्षात कोणतेही मतभेद नाहीत. आम्ही सर्व वरिष्ठ नेते एकत्र बसून यावर मार्ग काढत आहोत.” या बैठकीत प्रफुल्ल पटेल आणि तटकरे यांनी सुनेत्रा पवार यांच्याशी चर्चा करताना केवळ स्वतःच्या पदांबाबतच नव्हे, तर हसन मुश्रीफ आणि धनंजय मुंडे यांसारख्या तळागाळातील मजबूत जनाधार असलेल्या नेत्यांना राष्ट्रीय पातळीवर मोठी जबाबदारी देण्याची आग्रही मागणी केली.

कोल्हापूर आणि पश्चिम महाराष्ट्रात राष्ट्रवादीचा मोठा चेहरा असलेले हसन मुश्रीफ आणि बीडसह मराठवाड्यात पक्षाची ताकद टिकवून ठेवणारे धनंजय मुंडे यांना राष्ट्रीय कार्यकारिणीत महत्त्वाचे स्थान देण्याचा निर्णय आता अंतिम मानला जात आहे. यापूर्वी एप्रिल महिन्यात झालेल्या काही घडामोडींमध्ये या नेत्यांना डावलले गेल्याची चर्चा पक्षांतर्गत वर्तुळात होती. मुश्रीफ आणि मुंडे हे दोघेही अजित पवारांचे अत्यंत विश्वासू आणि आक्रमक नेते म्हणून ओळखले जातात. आगामी स्थानिक स्वराज्य संस्थांच्या निवडणुका आणि राज्यातील बदलणारे राजकीय समीकरण पाहता, या दोन्ही नेत्यांना राष्ट्रीय कार्यकारिणीत सामावून घेणे पक्षासाठी अत्यंत आवश्यक बनले आहे.