Dharmendra Pradhan: पंतप्रधान नरेंद्र मोदी यांच्या निवासस्थानाबाहेर राहुल गांधी यांनी काल धरणे आंदोलन केल्यानंतर केंद्रीय शिक्षणमंत्री धर्मेंद्र प्रधान यांनी सोशल मीडियावर सविस्तर प्रतिक्रिया दिली. त्यांच्या पोस्टमध्ये त्यांनी नेमकं काय म्हटलं, जाणून घेऊया.
नीट (NEET) परीक्षेच्या मुद्द्यावरून केंद्र सरकार आणि काँग्रेस यांच्यातील राजकीय संघर्ष आणखी तीव्र झाला आहे. पंतप्रधानांच्या निवासस्थानाबाहेर काँग्रेसने केलेल्या आंदोलनानंतर केंद्रीय शिक्षणमंत्री धर्मेद्र प्रधान यांनी सोशल मीडिया प्लॅटफॉर्म ‘ एक्स’ वर पोस्ट करत राहुल गांधी आणि काँग्रेसवर जोरदार टीका केली.
धर्मेंद्र प्रधान (Dharmendra Pradhan) यांनी आरोप केला की, संसदेच्या पावसाळी अधिवेशनात गोंधळ निर्णय करण्यासाठी काँग्रेस विद्यार्थ्यांचा राजकीय साधन म्हणून वापर करत आहे. पंतप्रधानांच्या निवासस्थानाबाहेर आंदोलन करून सर्वसामान्य नागरिकांना गैरसोय केली तसेच सुरक्षा नियमांकडेही दुर्लक्ष करण्यात आल्याचा दावा त्यांनी केला.
हेही वाचा: भक्तीला सलाम! 80 वर्षीय वारकरी आजींना कलेक्टरांनी घडवले विठ्ठलाचे विशेष दर्शन
प्रधान (Dharmendra Pradhan) म्हणाले की, सरकारने नीट परीक्षेच्या मुद्द्यावर सविस्तर चर्चा करण्याची तयारी स्प्ष्टपणे दर्शवली होती. मात्र, लोकशाही पद्धतीने चर्चा करण्याऐवजी काँग्रेसने राजकीय नाट्याला प्राधान्य दिले. विद्यार्थ्यांच्या समस्या सोडवण्यापेक्षा राजकीय प्रसिद्धी मिळवण्यासाठी गोंधळाचे वातावरण निर्माण करणे हाच विरोधकांचा उद्देश असल्याचा आरोप त्यांनी केला.
राहुल गांधी (Rahul Gandhi) यांच्यासाठी हा विद्यार्थ्यांचा प्रश्न नसून, चर्चेचे सर्व मार्ग खुले असतानाही संघर्षाचे वातावरण निर्माण करण्याचा प्रयत्न असल्याचेही प्रधान यांनी आपल्या पोस्टमध्ये म्हटले आहे.
याचबरोबर, नीट परीक्षेसंदर्भातील प्रत्येक मुद्द्यावर संसदेत चर्चा करण्यास सरकार पूर्णपणे तयार असून तरुणांच्या प्रत्येक रास्त चिंतेचे निराकरण करण्यासाठी केंद्र सरकार कटिबद्ध असल्याचे त्यांनी स्पष्ट केले. विद्यार्थ्यांना राजकीय प्रचाराचे साधन न बनवता त्यांना निश्चितता, आवश्यक सुधारणा आणि उत्तरदायी व्यवस्था देणे हे सरकारचे प्राधान्य असल्याचेही त्यांनी नमूद केले.
धर्मेंद्र प्रधान यांच्या या पोस्टनंतर नीटच्या मुद्द्यावरून सुरू असलेला काँग्रेस आणि भाजपमधील राजकीय वाद आणखी तीव्र होण्याची शक्यता व्यक्त केली जात आहे.
